- Dr Lalmalsawma
Cess hmanna hriat tur awm lo
- Dr Lalmalsawma
ZPM sawrkarin social infrastructure leh road infrastructure cess an lakna chu a hmanna tur taka an hman awm hriat tur a awm lo tih Congress hruaitu Dr Lalmalsawma chuan a sawi.
Zirtawpnia Congress Bhavan-a inkhawmah MPCC treasurer Dr Lalmalsawma Nghaka chuan GST khawn tlahniam chak lutuk chu engemaw thil fello a awm tih a sawi a. Sumdawngten inhralh har an ti a, phat rual lohin sum lengvak a tlem hle, tiin, “State sales tax an tipung a, social infrastructure leh road infrastructure cess an lak hi a hmanna turah an hmang em kan hre lo. Social infrastructure cess hi mi harsa tanpuina atan hman tur a nih laiin a thawm kan hre loa, road infrastructure cess hi kawng siamna atana lak a ni a, kan kawng chu tlan hrehawm khawpin a chhe si,” a ti.
PWD engineer pakhatin a hrilh danin, hna reng reng departmental work-a thawh niin, sawrkarin supervisor an ruat a, department-in hmingchhiat a tuar leh si tih a nih thu Congress hruaitu hian sawiin, Health minister-in health care sawiselna a officer-ten an chhang zel dawn, tia a sawi angin, PWD chungchang hi chhang ve zel se an duh tih a sawi.
ZPM sawrkar chu central atanga scheme hrang hrang lokalte hmang tangkaiin Bana kaih hming an phuah a, central-in BPL leh AAY tana health care a siam – Ayushman Bharat pawh anmahni kutchhuak angin Mizoram Universal Health Care ah an hnuklut leh mai niin a sawi bawk.
“Congress hi mipuiin min hriat dan chu, kan ti ang kan tih chu kan ti thin. Congress hian kan sawrkar laiin thil tha tam tak kan lo ti tawh a, kan ti leh zel dawn a ni,” Dr Lalmalsawma hian a ti.