Chak lo mah ila kan tum kan hlawhtlingin kan hria – AMVCA president

Chak lo mah ila kan tum
kan hlawhtlingin kan hria
– AMVCA president
Sawrkarin village council term a pawh tawi avanga Gauhati High Court-a a mimal hminga sawrkar khingtu All Mizoram VC Association (AMVCA) president K Lalngaizuala chuan, court rorelnaah chak zo ta lo mah se, VC-te chu mipui thlan, mipui rorelna bulthut an ni tih mipui hriat thar tir kawngah an hlawhtling thoa an inhriat thu a sawi.
Mizoram sawrkarin VC term dinglai thla 6-a a pawh tawina thupek, AMVCA aiawha High Court-a an khinnaah hnehna an chang zo ta lo tih K Lalngaizuala hian a sawi a. Sawrkarin VC-te a thuneihna a lekkhum a, an term dinglai a pawh tawi sak dawnah sawrkar hian a chhan leh vang engmah a sawi loa, VC dinglaite rawn derna emaw mipui aiawhte rawnna emaw political party dangte biakrawnna emaw pawh a awm lo tih a sawi.
Sawrkar hotuten mipui hmaa an thusawi, chanchinbu leh TV news atanga lo langte atangin, ruling VC ni ve lo, party dang VC dinglaite ngaihtheih lohna a langsar hle tih sawiin, “VC-te hian sawrkarin tih tur min tuk apiang mipui tan theihtawpa kan thawh reng laiin, sawrkar thawhpui duh lo anga min puhna khan kan rilru a tina a, khawi VC-in nge sawrkar thawhpui duh lo tih puang tura sawrkar hotute pawh ngenin, chutiang VC an lo awm a nih chuan keimahni kan lo inzilhhau tur thute press release siamin kan lo puang tawh a. Hetiang boruak kara sawrkar dinglaiin VC term pawt tawi a, a hun hmaa inthlan buatsaih a tum tlang hi party dang VC-te min dah bo thuai thuai tumna leh ruling party sawhngheh tumna a ni tih a lan avangin, mipui thlan VC-te zahawmna vawnghim a, democracy ropuina venhim tumin dan rorelna, High Court kawngkhar kan kik ta a ni,” a ti.
Hetihlai hian sawrkar hotuten VC term dinglai pawt tawi tura an thuneihna a lek khum chhan, an rilru kha dan rorelnaah chuan buk tel theih a ni si loa, dan hmanga an beihletnaah hnehna an chang zo ta lo tih AMVCA hruaitu hian a sawi a. Aan tum ber, court kawngkhar hial an kik chhan chu, hun lokal zel tura mipui aiawha thlan VC-te zahawmna vawnhim a ni, tiin, hemi kawnga AMVCA member-ten theihtawp an chhuahnaah an lawm a. Hetihrual hian mipui rorelna bulthut VC-te, sawrkar apiangin an duh huna an namthlu zel thei dawn ta chu pawi an tih lai ber a ni tih a sawi.
Sawrkarin VC dinglaite a namthluk chhan leh a hun hmaa a inthlan pui luih chhan ber nia Mizoram sawrkar dinglaiin court-a a sawi chu, 15th Finance Commission atanga Mizoram sawrkarin Post Devolution Revenue Deficit Grant (PDRDG) a hmuh tlakhniam zel vang a ni, tih chu pawm harsa an tih sawiin, PDRDG a tlakhniam zel rual hian 15th Finance Commission atanga Mizoramin sum a hmuhna dang – share of taxes, rural local body grant, urban local body grant leh State Disaster Risk Management Fund hnuaia sum hmuh a pung zel thung a. Sawrkar kum thar 2025- 2026 chhung khian 15th Finance Commission atanga Mizoram sawrkar sum hmuh tur zawng zawng chu cheng vaibelchhe 6120 niin, hei hi sawrkar kum kal lai 2024- 2025 a hmuh tur cheng vbch. 5932 aiin vbch. 188 in a tam zawk tih a sawi.
“Sawrkar kum kal laia sum hmuh tur chhut lawk aia sawrkar kumthara sum hmuh tur chhut lawk a tam zawk daih lai a, a hun taka inthlanna buatsaih theih loh chhan chhuanlama sum hmuhna head pakhat tlahniam awmchhun chhuanlama hman hi a pawmawm loh hle,” AMVCA president hian a ti.
School calendar 2024- 2025 a zirlaite exam hun leh VC/LC inthlan chu a insu buai dawn a, inthlana duty tur tam tak zirtirtu an ni tih leh polling station atan school building engemawzat hman a ni dawn tih hre reng chungin, chumi nena intibuai chiaha inthlan buatsaih ngai turin VC term dinglai chu, 2025 February 19-a tawp turin Mizoram sawrkar chuan inthlan a puan hnan tlat tih a sawi bawk.
“Sawrkar dinglaiin VC-te min hmuh dan leh min enkawl mek dan hi mak kan ti hle. Tunhnai maiah pawh AMVCA-a kan member – Hnahlan, Thekpui leh Sialhawk VC-te sawrkarin nikum lama a lo thiahna thupek chu Court-in hnawlin, an hna pangngai chhunzawm tir nghal turin sawrkar hriattir mah se, vawiin thlengin sawrkarin an hna a la chhunzawm tir duh chuang lo. Heng zawng zawngte thlir hian, Mizoram sawrkarin VC term dinglai pawt tawia inthlan min neih luih pui tumnaah hian dan hnuaiah hnehna chang mah se, mipui thinlungah erawh hnehna an chang chuang loin kan hria a. Kan tum ber, VC-te hi mipui thlan, mipui rorelna bulthut kan ni tih mipui hriat thar tir kawngah kan hlawhtling thoin kan inhria a ni,” K Lalngaizuala hian a ti.