Chak loh thiam lo Real Madrid!

Chak loh thiam lo Real Madrid!
Nilaini zan UEFA Champions League inkhel lianah Jude Bellingham goal khat tihluh hmangin Real Madrid chuan an mikhual Juventus lakah 1-0 hnehna an sualchhuak leh hram a, tun season Champions League-a match thum an khelh tawhah hnehna la chang fai vekin, la chak vek dang PSG, Bayern Munich, Inter Milan leh Arsenal hnuaiah awmin table-ah pangana an luah.
Santiago Bernabeu, Madrid, Spain-a UEFA Champions League match-ah hian second half tir lam minute 57-a Bellingham goal thun chu Italian Serie A giants Juventus lamin an sut zo lo tluanchhuak.
Real chakna goal awmchhun kha Vinicius Jr siamsak niin, Brazilian mihang player hian Juventus player pathum hual vel karah goal thun tumin a shoot a, goal kham perin, chu ball letleh chu a hmun dik taka lo awm Bellingham chuan goal-ah a chantir zui ta tho a; England midfielder tan a dar na an zai hnua tun season-a a goal thun vawi khatna a ni.
He inkhel hi first half-ah a nung lo viau nain second half boruak chu a dang ta daih a; an innawrtawn zak zak a ni ber.
Mikhual tih takah Juventus lam an fimkhur a, goal ven lam an ngaipawimawh a, tlarhnungah player panga thawt an dintir a; goal an zawnna pui ber chu counter attack a ni.
Madrid goalkeeper Thibaut Courtois a awm mai mai hman bik lo a, vawi duai lo ‘save’ tha tak tak neiin, Dusan Vlahovic chuan a tir lamah Juventus hmahruai theihna hun tha nei mah se Real defender hnung ber Eder Militao a pelh tawh hnuah a shot chu Courtois chuan thui tak a ke lek chungin a lo dansak thei hram a ni.
Inkhelh bana Movistar Plus-in an kawmnaah Belgian keeper Courtois chuan match hautak leh rim taka thawh ngai a nih thu sawi chungin team pahnihin goal thun theihna hun remchang an hmuh ve ve thu a sawi a; team lian laka hnehna chan kha dahnep theih a nih loh thu leh a pawimawh em em thu sawiin, point kaw hmuh theihnaa point kua an hmu pha lawmawm a tih thu leh an tu leh tur Anfield lam an hawi chhunzawm tur thu a sawi.
Game an khel rei tulh tulh a, Madrid lamin hma an sawn hret hret a, inkhel pawh thunun hneh deuh deuhin, hun puma an shot neih zat pawh tum 28 zet a tling.
Juve goalkeeper Michele Di Gregorio khan ‘save’ pawimawh zet zet vawi hum neiin, chu’ng zing pahnih chu Kylian Mbappe goal thun tur niin, Brahim Diaz-a goal tur tum khat dang a dansak bawk.
Tun kha kumin August thla nawi hnu lama Mbappe goal khung zawh loh vawi khatna niin, Real Madrid leh France tan belhkhawma match 11 a khelh hnuhnungah goal a thun kim vek kha a ni a, Turin khaw team lakah erawh a goal thun tluang lai a chhunzxawm zo ta lo a ni.
Vinicius nen ball an inchuhna lama a ‘foul’ avangin Francisco Conceicao chuan red card a hmu teuh ther ther kher mai a, referee mitah foul aiin ball a tawk fuh lai kha a lang lian ta hlauh a, a him hram a ni!
Kartawp Pathianni hi Barcelona nena La Liga El Clasico an khelh hun a nih tawh mai avangin Real Madrid manager Xabi Alonso khan hun tawp dawn lamah ‘substitution’ a siam nual a; lehlam pawl insulpel zut karah hian Filip Kostic chuan hu pekbelhah box kil hriam lai atangin a chhuih kawh phei pawt a, Courtois bawkin a khawihsawn sak hman leh hlauh a ni.
European Cup game bik Bernabeu inkhela Real Madrid laka Ajax Amterdam nena chak reecord nei tha ber Juve hi September ni 13 atang khan an la chak leh ta lo char char a, inelna hrang hrangah a zawnin match sarih chhung hnehna an chang zo ta lo!
Champions League game thum an khelh tawhah point hnih chiah an la rut zo a, point kaw nei tawh Madrid nen inthlau hle tawhin, table-ah Italian club hian 25-na daih an luah duai tawh! Thawhlehni zan ang bawkin Nilaini zanah pawh English club pathum an chechhuak a, an zinga pahnih chakin, Tottenham Hotspur erawh Monaco mualah goal thun zo loin draw an hawn.