Chak ngaia nei titih tawh hial tura ngaih Naples khaw team chuan Inrinni Italian Serie A inkhel pakhat zawkah sihnih faiin mualneitu Empoli an hneh leh a, league table-ah an hmahruaina sawhnghet leh sauhin, anmahni hnaihbertu Inter Milan lakah point 18 tehrengin an sang tawh a, an tan title a hmin hnai zel.
Nizan inkhel result tarlan hman loh pakhatah International-in mualneitu Bologna an hneh a nih chuan Napoli nena an inkar hi point thumin an pawthnai leh hlek ang a, Serie A hmahruaitu pahnih hi point 15 bawkin an inthlau chhunzawm leh ang.
Inrinnia Napoli goal hmasa zawk kha first half minute 17-a Empoli defender Ardian Ismajli ‘own goal’ niin, minute 28-ah Nigeria forward Victor Osimhen chuan mikhual goal hnihna thawh ve lehin, season kal laia league goal 19 thun tling tawh Osimhen hi Cristiano Ronaldo hnu lama Serie A player zinga a zawna league game riat chhung goal khung kim vek thei hmasaber a ni nghal.
Ronaldo khan Juventus tana a khelh laiin match 11 chhung goal a thun zawn a, a record ding lai tluk thei kha an la chhuak lo.
Second half tir lam minute 64-ana lekah Portugal left-back Mario Rui chu Francesco Caputo laka a khawsak dan avangin hnawh-chhuah ni mah se table laihawl luahtu Empoli-in a tam zawk nihna an hlawkpui zo ta chuang lo a, player pakhata kim lo chungin Luciano Spalletti team-in an chetthat kal tluang lai an thlah duh chuang lo!
Chak thang Napoli tan title hnai zel
