Chak zawk awmlohna Madrid derby
Pathianni zanah Spanish top flight season kal laia Madrid derby hmasaber khelin Civitas Metropolitano stadium-ah Atletico Madrid leh an mikhual Real Madrid an intawng a, sikhat ve ve thunin Madrid derby a tawp.
Mipui 70,112 zet hmaah first half chhungin goal a lut lo a; goal hmasa zawk hi second half tir lam minute 64-ah Vinicius Junior siamsak atangin Eder Militao chuan mikhual hmahruaina goal a khung a, a hnu lawkah home fans lamin khawlhkham an siam avangin Madrid derby boruak tang et awt hi minute 20 chhung ngawt an chawl!
Inkhel an tan leh hnuah pawh goal dang a luhbelh thei ta mai lo a, hun pekbelhah pawh mualneitu team lamin an siphurh an sut mai theih loh avangin away fans an pawr tluanchhuak dawn niin a lang hman a, mahse, hun pekbelh minute ngana a kal mek laiin Angel Correa chuan Javi Galan chhawpsak atangin Atletico siphurh a sut nawlh a; he ti chinah hian drama a la tawp lo a, minute li a kal leh a, Marcos Llorente chu red card hmanga hnawhchhuah niin, a tam zawk an nih chhung erawh tih tham a awm tak loh avangin Bernabeu club-in goal dang an khungbelh zo ta lo a, La Liga season kal laiah Atletico Madrid-in tlawm an la pumpelh tluang ta zel a ni.
Khatia Militao-a goal a luh hnu lawk khan Real goalkeeper Thibaut Courtois chuan official-te hnenah complaint a nei a, a hnung lama home fans zi nuai nuai atangin an rawn vawm tih hrilhin, a thusawi tichiang turin lighter a lekkang va va nghe nghe.
Khelmuala aurinna an chhawp hmangin mipuite hriattur thu an rawn puang a, manager pahnih a biakrawn hnuah referee chuan inkhel titawp chhunzawm zelin team pahnihte chu an inthlakna pindan ve ve lama insaseng rih phawt turin a hriattir a, inkhel en tur a awm rih lo!
Atletico manager Diego Simeone leh a player thenkhat chuan an mipuite chu inbengdai turin an thlem a, minute 20 ngawt an chawlh hnuah inkhel chhunzawm niin, tarlan tak ang khan goal dang a luhbelh mai thei ta lo a, box chhunga Brazil centre-back Militao-a khakluh kha mikhual team-in an chakpui ngei dawn niin a lang hman a, league season kal laiah Atletico-in an tlawm vawikhatna an tawngbaw dawn niin a lang hman bawk!
Home supporter an ngui nghuai hman tawh hnuah substitute Correa chuan Courtois-a dan zawh loh khawp goal a khung ta tlat a; he goal hi a tirah hnawl a ni zet a, video assistant referee (VAR) kaltlanga zirchian a nih hnuah Argentina international chu through ball a um tir khan a offside lo tih nemngheh a ni a, Civitas Metropolitano stadium kha a chim ta emaw tih tur khawpin a bengchheng zui ta a ni.
1-1 a nih hnu hian goal lut lai hmuh tur awm tawh lo mah se Atletico player Llorente hnawhchhuahna hun erawh a la awm a, Fran Garcia laka a foul avangin derby hot zet chu red card hmanga tihtawp a ni!
Simeone chuan Madrid goal luh laia an keeper Courtois-a goal lawm dan kha a sawisel a, a hnunga an supporter rual hrilhhai taka indawmkunte kha a chochhuak ve pah reng niin a ngai.
DAZN-in an kawmnaah Argentine coach chuan, “Goal celebrate chu a thiang ngei alawm, mahse, lehlam pawl fans hawi zawng khera va runluih ang vel kha ni lo ve se.
Fans hi anmahni ngawtin an thinrim ngai lo a, chhan neia thinrim thin an ni ngai e,” tiin an supporter-te chet danah mikhual goal-veng chet dan a dem thu a auchhuahpui.
Atleti coach khan Real Madrid fans lam pawh kawk zui nghalin, Atletico player a nih lai khan lighter thahnem takin Belgian goalkeeper hi an lo vawm ve tawh tho tih a sawi!
Real manager Ancelotti thung chuan inkhel kal tluang lai tihtawp kha thutlukna dik tak a nih thu sawiin, hun tawp dawna an hmahruaina an hloh avang khan a team-te chu hnual phah tur an nih loh thu a tarlang tel a, “Kan chak teuh ther ther hle mai a, mahse, khati ang thil kha thleng thei lo a ni lo. Kan tumpuite kha an khawng ve lulai bawk em a ni. A thim zawng ni lo, a eng zawngin ka thlir thin,” a ti.
Inrinni zanah hmahruaitu Barcelona chuan league season kal laia 100% chak an kalpui mek chhunzawm zo loin Osasuna lakah an tlawm a, Pathianni zanah an hnuai chiaha pahnihna luahtu Real an chak zawh tak bik loh avangin hmahruaitu team pahnih hi khelh riat ve veah point thumin an inthlau a; pathumna Atletico chuan point 16 hum chungin Real hi point hnihin an pha lo.
La Liga season kal laiah Madrid club pahnih chiah hi tlawm la nei lo awmchhun an ni.
Ancelotti team hian league-ah match 40 chhung tlawm an pumpelh tling ta chiah a, an tlawm hnuhnunber chu season liamta September 2023-a Atletico an hneh loh kha a ni daih tawh.
Pathianni Madrid derby-ah kuminnipui laia an superstar lakluh Kylian Mbappe chu malpui tha na avangin an chhawr thei lo a, France captain-in derby-ah hming a la chher thei rih lo!
Second half tir lama sikhat faia hma an hruai hnu khan Real-in goal dang khungbelhna hun remchang zet an hmu a, mahse, home goalkeeper Jan Oblak chuan pui zetin lei hrul deuh thawa Vinicius Jr-a shot a dansak.
Courtois pawhin hun tawp dawna mualneitu team-in an siphurh sut ngei tuma an nawr nat chhoh laiin Atletico substitute Samuel Lino goal tur tha fahranin a dansak ve bawk.
Llorente kha a tirah yellow card pek phawt a ni a, a khawsak dan kha VAR-in a endik hnuin red-ah an kaisantir ta a nih kha!
Chak zawk awmlohna Madrid derby
