Champhai tlawhtu Gauhati High Court judge Justice Michael Zothankhuma chuan Champhai district-ah criminal case a pung chak tih sawiin, a kaihhnawih sawrkar thawktute bakah khawtlangin dan bawhchhiatna do tlan a tul tih a sawi/
Cheng nuai 4915.35 senga sak tum District Court Complex Champhai chu Thawhtanni khan Gauhati High Court judge pathum – Justice Michael Zothankhuma, Justice Nelson Sailo leh Justice Marli Vankung ten a lungphum an phum a. Justice Michael Zothankhuma chuan Mizorama dan bawhchhiatna hrang hrang dinhmun sawiin, case 6113 awm mekah a zahve vel (3032) chu dan bawhchhiatna liantham – criminal case a ni a. Champhai district-ah case 482 awm mekin, heng zinga case 367 (76.14%) chu criminal case a ni tih a sawi.
Champhai district-a criminal case pung chak em em chu veiawm a tih thu sawiin, sawrkar official-te, dan leh thupek kengkawhtute, tlawmngai pawl leh mipui chu dan bawhchhiatna do kawngah theihtawp chhuah tlan a tul tih a sawi a ni.
November 2021-a Champhai Judicial District din a nih hnuah hmalakna hrang hrang leh hmasawnna tam tak awm zelin, District Court changtlung tak ruahman tum chu lawmawm a tih thu High Court judge hian a sawi a. A sak hna hi High Court-in uluk taka a vil tur thu leh khawtlang mipui, NGO leh media pawhin uluk taka vilpui turin a chah.
District Court Complex Vengsang Champhai sakna tur hian administrative approval cheng nuai 4915.35 hmuh niin, kum 2023-24 atana expenditure sanction hi nuai 241.50 a ni. Contractor hi Beriwal Construction Guwahati an ni a, 2023 October 5 khan sak tan a ni tawh a, 2026 October 17 a zawh tum a ni.
Champhai district-ah criminal case pung chak
