Champhai district-a bank hrang hrang kaltlanga financial year 2023- 2024 December quarter tawp thlenga hmalakna thlirletin District Consultative Committee (DCC)/ District Level Review Committee (DLRC)/ District Level Security Committee (DLSC) chu Nilaini khan an chairman, district bawrhsap James Lalrinchhana hoin an thukhawm a. Champhai District RD Block pahnih huamchhunga bank leh stakeholder hrang hrangte hmalakna thlirho a ni.
Thutkhawma report danin, nikum December quarter chhunga Champhai district-a bank hrang hranga sum dahluh leh pekchhuah zat inthlauh dan khaikhinna – Credit Deposit (CD) Ratio chawhrual zaa 69.40 a ni a, quarter hmasa September 2023 quarter tawpa CD Ratio 68.27% aiin 1.13% in a pung a; hei hian CD ratio tha ni tura hniam lam bituk zat 60% chu a khum a ni. Hemi hun chhung hian bank-ah cheng nuai 55067.17 dahluh a nih laiin bank-in sum a pekchhuah zat hi cheng nuai 38214.35 a ni.
Social security scheme PMJJBY hnuaiah inziaklut 5429 awmin, PMSBY hnuaia inziaklut 7890 leh APY hnuaiah 616 an inziaklut a. Mudra Loan mi 338 pek niin, cheng nuai 1817.12 a tling. KCC/ST crop loan mi 247 hnenah cheng nuai 411.90 (15.11%) pek niin, bank chhawr tangkai dan inzirtirna financial literacy campaign (FLC) tum 27 neih a ni.
Bank branch-te hnen atangin pawisa thir an dawn reng theih thu sawi a ni a. Pawisa chhia hman tlak loh thlak zung zung a nih theih nana hma la theuh turin bank-te chah an ni. Heng bakah hian bank-in sum a kawl theih zat, currency management -remittance leh security chungchang sawiho a ni bawk.
Financial year 2023- 2024 December quarter tawp thleng khan Champhai district-ah bank branch 18; commercial bank 5, private bank 5, regional rural bank 7 leh state cooperative bank 1 bakah ATM 10 a awm a ni.
Champhaiah CD Ratio tha thawkhat
