Champhaiah vbch. 117 hu ruihhlo halral
International Day Against Drugs Abuse and Illicit Trafficking denchhenin Ningani khan Champhai District Drug Disposal Committee chuan ruihhlo an man, tualchhunga an leina anga chhutin cheng vaibelchhe 117 chuang hu an halral.
Halraltu Champhai bawrhsap Mohammad Aaquib chuan Champhaiah heti zat ruihhlo man a ni chu Mizoram mai ni lo, India ram hmun hrang hrangah ruihhlo do kawngah nghawng nasa tak a nei tih a sawi a. Ruihhlo do kawnga inzirtir leh inhrilhhriat thin chuan thalaite ah ruihhlo that loh zia leh do a tul zia nasa takin a tuh mek tih a sawi a ni.
Champhai SP Lokeshwaran R chuan India ram hmun hrang hranga tawlh luh tur Champhaia lo dangchat thintu dan leh thupek kengkawhtute chungah lawmthu a sawi a. Police-ten ruihhlo kengtute chauh man an tum loa, ruihhlo neitu leh a tirtute man chu an tum lian ber a ni tih a sawi.
International Day Against Drugs Abuse and Illicit Trafficking denchhena ruihhlo halral hi Champhai Police-in June 2024 atanga April 2025 chhunga an man, court-in halral tura phalna a pek tawh niin, Rs. 1,17,03,45,500 hu a ni. Heroin kg 24.841, methamphetamine kg 249.125, crystal methamphetamine kg 25.834 a ni.
Champhai Police hian kum 2024 chhung khan ND&PS Act tlawhchhanin thubuai 172 an ziaklut a, mi 221 manin an zinga 39 chu rampawn (Myanmar) mi an ni. Champhai Police hian kum 2024 chhung khan heroin kg 47.107, methamphetamine kg 206.312, crystal meth kg 34.115 leh ganja kg.27 an man. Kumin January atanga June 25 thleng khan ND&PS Act tlawhchhanin thubuai 84 an ziaklut a, mi 144 manin an zinga 26 chu ramdangmi (Myanmar) an ni. Kum 2025 chhung hian heroin kg. 18.570, methamphetamine kg. 458.698 leh crystal meth kg 5.169 an man tawh a ni.
Champhaiah vbch. 117 hu ruihhlo halral
