Champion hlui hnehtu Sihphir
chak ni herchhuak ve ta nge nge
Pro Division inkhelah a vawikhatna’n Sihphir an chak a, Ningani zan EverHome Pro Volleyball League-ah set thum set khatin Anastasia Electric Veng an hneh.
Mizoram volleyball division sang bera an tel atangin Sihphirin harsatna an tawk a, set la miah loa khelh ruk an tlawm zawn hnuah tunhnaia an lakluh Niyas Abdul Salam leh Lalhmunmawia (Mapuia) chuan team tanpuiin, Anastasia lakah 25-15, 25-23, 18-25, 25-21 hnehna nen Pro Volleyball League-ah chak ni hmel an hmu ve ta nge nge e.
Tun season atangin Pro Division-ah Sihphir an awm a, nikum October khan Invitation Cup-ah vawi hnih inkhelin set la loin an tlawm ve ve.
March thla khan MVA Cup-ah tum li inkhelin set la lo bawkin an chak lo vek bawk!
Pro Volleyball atan Kerala player Niyas lalutin a inlan hmasak berah point 23 hmuin 10 a hloh a, Kuriz Player of the Match lawmman a dawng.
An chak theihna’n an player thar Mapuia’n tum 10 vaw tlain vawi nga a tisual bawk a; set hmasa pahniha chetha Thangminlal Guite chuan point kua hlawhchhuakin point li a paih ve thung.
Albert Zothankhuma’n point thum hlohin tum riat a hlap tla a, team danglam lantirin inkhairual takin Sihphir tan Mizo player-te’n an khel.
Kum 2019 hnua Pro Volleyball-a an inlan hmasak berah Anastasia an tang tlai a, set hnih an hloh zawn hnuah beiseiawm takin nawrlet mah se set thumna tawp lamah Sihphir an insiamtha a, an su tlang zo lo.
Laldensanga’n point 12 a hmuh zat chanve hlohin, Lalruatsanga pawhin point 10 a hmuh zahve tho a paih a; set thumna atanga khel Laldinsanga’n vawi sarih vaw tlain point hnih a hloh a, Rochanpuia nen an point hmuh leh hloh a inang.
Anastasia tan Mizo player-te’n khel chhe hran lo mah se Uttar Pradesh atanga an lakluh Yougank Baliyan chuan a kutah hliam a neih avangin nikuma Chhinga Veng Spikers tana a khelh lai angin a inlan pha lo hle a, point nga hmuin point nga tho a hloh.
Sihphirin state dang atanga an lakluh Niyas angin awmzia a nei tham lo a, anni pahnih hi team pahnih inkara danglamna siamtu langsar a ni.
Set khatna hneh takin Sihphirin an thunun nghal a; Niyas, Thangmin leh Mapuiaten point 14 thawkchhuakin point 10-a inthlau chungin an tlang.
Set hnihnaah Anastasia-in hma an sawn naa, inthlau loin a umtu zawkah an tang tluan tho a; Densanga’n a vuak tlak rualin 21-20-in an hnaih hman.
A hnuah Niyas chuan hui tlain Mapuia’n a vaw tla zui bawk a, set la zawn thei turin 24-21-in Sihphir an sang a; Mapuia leh Thangmin chuan hlap sual zawnin 24-23-in derthawng leh hman mah se Densanga’n a service dik loh avangin Anastasia hun tha a liam.
Pro Volleyball hmasa ber 2016 champion Electric Veng club-in set thumnaah Yougank thlakin Dinsanga an luhtir a, Mizo hlangin Sihphir an beilet.
Densanga’n team fuih phurin hma an hruai char char a; Sihphirin 17-16-a an hnaih hnuah Dinsanga’n tum li a vaw tla a, derthawng zui loin set an la a, inkhel boruak a nung thar bawk.
Set linaah an inhnehtawk hle a, 21-21 a nih laiin Niyas chuan a hnung atangin a vaw tla a, nih rual lehna hun tha Anastasia-in an hloh a, Densanga’n line pawnah a hlap chhuak.
Sihphir tan set linaah PC Lalnuntluanga a langsar a, a vuak tlak hnuah lehlam tan Ruatsanga’n line pawnah a vaw chhuak.
24-21 a nih laiin Nuntluanga’n a nam tla a, Sihphirin boruak thar hipin rahbi thar an tuk. Pro Volleyball an khelh hmasak berah chak nghalin inrintawkna sang zawk nen nizanah an khel leh nghal a, Hunthar laka chak tawh Khawbel nena an result erawh tarlan hman a ni lo.
Insiamremna’n hun an mamawh rei deuh avangin Anastasia-in an tuar a, set thumna atangin tha pangngai takin khel mah se an mar tluan chhuak zo lo a, karleh Thawhtanniah fiahna hautak zawk hmachhawnin Tuichangral nen an intum zui leh dawn a ni.
Champion hlui hnehtu Sihphir chak ni herchhuak ve ta nge nge
