Inrinni zan khan FC Cup third round khelh a ni a, FA Cup chanchina inlehthalna lian ber pawl thlengin champion lai Crystal Palace chu league pawh khel phak lo Macclesfield FC hneh lovin an tla. Palace an tlak lai hian Manchester City erawh chuan awlsam zetin hnehna an chang ve thung.
League pawh khel phak lo, club ranking ah pawh Crystal Palace aiin 117 zeta hniam zawk Macclesfield FC hian FA Cup champion lai Crystal Palace chu Leasing.com Stadium-ah an mikhual. An mualah beisei phak bak fea khel thain goal hnih an thun hmasa. Macclesfield FC tan hian Paul Dawson chuan minute 43-naah hmahruaina goal a thun a, Palace a barakhaih. Eagles hian an si phurh sut tum viau mah se an sut thei lova, goal an chhuah belh zawk. 6th Tier club Macclesfield tan hian Isaac Buckley-Ricketts chuan minute 60-naah an goal hnihna thun zui lehin, an hmahruaina a ziau.
An hneh ngei tura ngaih lakah si hnih an phurh hnuin Palace in tlawm pumpelh ngei tumin tan an khawh. An khingpuite nawr na viau mah se goal erawh an thun har hle. Minute 90-naah Yéremy Pino chuan goal thunin, beiseina thar nei bawk mah se goal dnag an thun belh thei tawh lo va, mualpho taka tlain, FA Cup atangin hnawhchhuah an ni zui ta a ni.
Crystal Palace an mualpho laiin team lian Manchester City chuan awlsam takin hnehna an chang ve thung a, an khingpui Exeter City chu 10-1 ngawtin an sawp. Team lian Chelsea pawhin manager thar Liam Rosenior hnuaia an inlan hmasak berah hnehna an chang a. Blues hian mikhual an nihna hmunah mualneitu Charlton Athletic chu 5-1 in an hneh a, Rosenior hnuaiah bul an tan tha nghal viau.
Inkhel dangah Newcastle United in hnehna an chang hram a. EPL table mawngphaha awm Wolves in awlsam takin hnehna an chang a. Sunderland in penalty-ah hnehna an chang ve bawk.
Champion lai Crystal Palace an tla
