Inter Milan chu kum 2015 hnu lama Serie A champion ni chunga season bultanna inkhela chak zo lo hmasaber niin, karliamta Inrinni khan mualneitu Genoa nen goal hnih ve ve thunin an inhnehtawk.
Internazionale hian point thum hmu chungin bul an tan teuh hle a, hun pekbelh minute ngana a kal mek laiin an hmahruaina an hloh a, Simeone Inzaghi team bultanna a fuh tawk lo.
Genoa lam hian goal thun hmasain, tan atanga minute 20-na lekah Alessandro Vogliacco chuan home team hmahruaina goal a thawh a; minute 10 a liam leh rualin Marcus Thuram chuan Inter sipurh sutna goal tauhlutin team pahnih hi half time-ah 1-1-in an intluk phawt.
Second half-ah goal a lut mai ta lo a, hun pangngai tawp hma minute riat chiah awm tawhah an siphurh suttu Thuram bawkin Inter hmahruailetna goal thawh lehin, defendeing Serie A champion hi 2-1-in an chak thei mai dawn nia a lan hnu hun pekbelh tawp dawnah Genoa lam hian Yann Bisseck handball vangin penalty an hlawhchhuak nawlh a, AC Milan player hlui Junior Messias chuan petin, Inter keeper-in a dansak zet a, ball perlet hmangin Messias hian mualneitu team siphurh a sut zui ta tho a, Internazionale-in an title kawl lai humhum tura bul an tanna inkhelah hnehna an chang zo lo.
Inter boss Inzaghi chuan inkhelh bana an kawmnaah a naute’n professional khelh dan tur renga an khel chhuak thei chunga hnehna an chang zo lo kha pawi an ti hle tih a sawichhuak.
Inekhel dangah San Siro khelmual luahtu dang AC Milan pawh an chak zo bik lo a, hun pangngai tawp hma minute khat chauh awm tawhah sihnih faiin la hnufual mah se Torino lakah mak takin 2-2 draw an hlawhchhuak!
Inkhel thunun zawk Torino hian Malick Thiaw own goal leh Duvan Zapata tauhluh hmangin sihnih faiin hma an hruai zet a, 2-0 hi an result ni thei mai dawna a lan hnu minute 89-ah Alvaro Morata chuan a Milan debut-ah a club thar tana a goal hmasa ber khungin, hun pekbelh zawh dawn lamah Noah Okafor chuan Milan siphurh sut zawhna goal a thawh ve leh a, Genoa tan a hrilhhaithlak duh khawpin a rinawm!
Kum thum an kalbo hnua Serie A kawtkaia an kirleh vawikhatnaah Parma pawh an chak zo bik lo a, Fiorentina nen 1-1-in an inhnehtawk.
Dennis Man chuan Parma hmahruaina goal tilut zet mah se Fiorentina captain Cristiano Biraghi chuan fuh zeta free-kick chhuihin team pahnih an inhnehtawk phah ta a ni.
Inrinni Serie A inkhel dangah Empoli leh Monza pawh goal thun loin an inhnehtawk ve bawk.
Champion lai Inter chak zo lo!
