January 6, Thawhtan zan khan Africa Cup of Nations (AFCON) last 16 khelh chhunzawm niin, last 16 khelh zawh a ni a, quarter-final lut a hriat kim theih ta chiah. Thawhleh zana inkhelah champion lai Ivory Coast chuan awlsam takin Burkina Faso an hneh a, quarter-final an lut. Ivory Coast hian Egypt an hmachhawn zui leh ang.
Amad a vul
Thawhleh zan khan champion lai Ivory Coast chuan Stade de Marrakech-ah Burkino Faso an hmachhawn. An khingpui lakah The Elephant hian an khel tha viau a, si thum fai ngawtin hnehna an chang. 3-0 a hnehna an chan theih nan Ivory Coast tan Manchester United midfielder Amad Dialloa vul viau a, goal khat a thun bakah assist vawi khat a nei bawk.
Champion nawn leh tumna hma lam pan mek Ivory Coash tan hian Amad Dialloa chuan minute 20-naah hmahruaina goal a thun. Hma takah goal an thun vangin defending champion team hi an phur a, inrintawkna sang zawk nen Burkina Faso an hmachhawn zui theih phah.
Phur taka inlan The Elephant hian hun tha nei bawk mah se an chhawr tangkai bik mai lo. An khingpuite nen an innawr tawn chhen hnuin goal thun hmasa zawkah an tang nawn leh. Gial hmahruai thuntu Amad Dialloa siamsak atangin Yan Diomande chuan minute 32-naah an goal hnihn a thun a, an hmahruaina a tizau. Goal hnih an thun theih nan United midfielder Amad a thawhhlawk viau a, Burkina Faso lakah hmuhnawm takin a inlan. Diomande goal thun hnu hian chawlhlawk hmain goal dang a luh belh thei tawh lova, Ivory Coast in 2-0 a hmahruai chungin chawlhlawk an hmang a, quarter-final an hnaih viau tawh.
Chawlhlawk hnu lamah inkhel a hmuhnawm zui viau a, Burkino Faso in an si phurh sut ngei tumin tan an khawh nasa hle. An si phurh sut tumin thih thah tak meuh meuh chhuah bawk mah se Saipui kal lai an bauh ding zo lova, goal an thun thei lo zel. An hun tha neih an hlah zel vangin hun tawp dawn hnaihah an chesual leh ta nge nge a, goal an chhuah belh leh ta zawk.
Champion lai Ivory Coast in chiai hauh lovin an khingpuite an hmachhawn a, an hun tha neih an chhawr tangkai leh ta nge nge. Second half-ah goal lut a awm belh theih loh reng hnuin hun tawp dawn hnaih minute 87-naah Bazoumana Touré chuan an goal thumna thunin, an chakna a nem nghet. Goal an chhuah belh leh tak vangin Burkino Faso chu phum ang hlauh an ni tawh a, champion lai lakah si thum ngawt an phurh tawh vangin thochhuak leh rual an ni tawh lo. Toure goal thun hnu hian goal dang a luh belh thei tawh lova, Ivory Coast chuan awlsam taka hnena changin quarter-final an lut a. An trophy kawl mek humhim turin vawi thum chak chiah an mamawh tawh. Champion nawn leh ngei tumin tan an khawh nasa hle ngei ang.
Algeria an chak tlai
Thawhleh zana inkhel dangah champion hlui Algeria chuan Congo DR an hmachhawn a, hun pangngaiah hnehna an chang thei bik lo. An hneh ngei tura ngaih lakah harsa takin hnehna an chang thei hram chauh a, extra time tawp dawn hnaiha an goal thun chu quarter-final an luhpui thei hram.
Stade Prince Moulay Al Hassan-ah Algeria leh Congo DR te an inhnehtawk viau a, hun pangngaiah goal thun thei an awm lo. Hun pangngaiah goal thun thei an awm loh hnuin extra time-ah pawh goal a lut har hle a, penalty shoot-out hmanga thelh an ngai hman teuh hle. Hun rei tak chhung goal lut a awm theih loh hnuin Algeria tan Adil Boulbina chuan minute 119-naah goal pawimawh zet a thun. He goal hmang hian hnehna hlutak an chang zui a, Nigeria hmachhawn turin quarter-final an inhlangkai ta a ni.
Algeria leh Nigeria te hi Inrinni zanah an inkhel ang.
Champion lai Ivory Coast an tlang
