Thawhlehni quarter-final match-ah defending champion Aryna Sabalenka chuan 6-2, 6-3-a French Open champion hlui Barbora Krejcikova hnehin Australian Open hmeichhe singles title a kawl mek humhim turin last four a lut leh ta phawt a, amah lo nghaktu US Open champion Coco Gauff nen final luh an inchuh ang.
Belarusian hi a zawnin Mel-bourne Park-ah match 12 a chak tling ta a, AO semi-final a luhna kawngah game 16 chiah a la hloh.
Second seed Sabalenka chuan ninth seeded Czech Krejcikova a hnehna game chu match ropui tak nia a hriat thu sawiin, khatiang taka ropui tennis kha a khelh chhunzawm zel theih a beisei thu a tarlang tel a, nikum ang bawkin tun pre-season lamah pawh a thawkrim leh a, a thawhrimna rah a seng nia a ngaih thu a sawi.
Nikum September thla Flushing Meadows-a US Open final-ah Belarusian Sabalenka hian tualchhung mihang tleirawl Gauff ngam loin a grand slam title pahnihna tur a hloh phah a, Melbourne Park-ah Daphne Akhurst Memorial Trophy humhim tum pahin phuba lak a ngaihven tel dawn!
Nimin khan Ukrainian Day-ana Yastremska chuan quarter final match dangah Czech Republic ve tho Linda Noskova chu 6-3 6-4-in a hnawtchhuak a, kum 44 chhunga qualifier ni chunga Australian Open semi-final thleng thei hmasaber a ni.
Khawlum uap pik churhin Melbourne khua a tuam mek a, nimin inkhelh lai pawh khan court chhung boruak lum zawng chuan degrees Celsius 30 (86 degrees Fahrenheit) a kai chho a, hetiang boruak sa huam huam hnuaiah Ukrainian chuan a forehand pui tak hmangin Czech tleirawl kum 19 mi a hneh a, kum 1978 hnu lama qualifier ni chunga last four thleng leh thei awmchhun a ni nghal.
Women’s draw lama la dam zinga player naupang ber ni chunga khelmual lut Noskova pawh khan a tumpui a tumpui kum 23 mi Ukrainian kha a chhaihbuai ve fo a, mahse, a tour singles title hmasaber tur beisei zui thei lo tur zawngin a chak zo ta lo a ni.
World number 93 Yastrems-ka khan tournament kal laiah hian grand slam champion pahnih hneh tawhin, nimin quarter-final hnuhnung inkhel result tarlan hman loha 12th seed Zheng Qinwen of China leh Russian world number 75 Anna Kalin-skaya chak zawk zawk nen final luh an inchuh ang.
Champion lai Sabalenka tlo zel
