Pathianni zan khan Afcon 2023 last 16 khelh chhunzawm a ni a, DR Congo chuan inlehthalna lian thlentirin he inelnaa champion ngun ber Egypt an hnawtchhuak. Pathianni zana inkhel dangah Guinea chuan Equatorial Guinea an hneh ve bawk.
Afcon-ah vawi sarih champion tawh a, champion ngun ber ni mek Egypt hian Stade Laurent Pokou-ah DR Congo an hmachhawn a, an player pawimawh Mohamed Salah tel lova inlan ni bawk mah se chak tura rin zawk an ni. Beisei loh takin goal chhuah hmasaah an tang a, chawlhlawk hmain goal thun bawk mah se goal dang an thun belh thei lova, penalty shootout ah vanduai zawkah an tang chhunzawm.
Rin kai lo zawk DR Congo tan hian minute 37-naah Meschack Elia chuan hmahruaina goal a thun nawlh a, Aigupta mite a barakhaih chiang hle. Goal an chhuah hnuin Aigupta player te an insiamtha thuai a, goal hmangin an khingpuite an chhang let nghal thuai. Minute 45+1-ah Stade Laurent Pokou chuan penalty atanga goal thunin an si phurh a sut. 1-1 in hun rei tak an inhnehtak a. Extratime minute 30 an khelh zawh thlenga goal thun belh thei an awm loh vangin penalty pet chhunzawm a ni. Goal an inthun chhawk zak zak hnuin DR Congo in chak theihna hun tha an nei a, an si nghak Lionel Mpasi chuan chiai hauh lovin chakna goal a thun a, Egypt hnawtchhuakin, DR Congo hian quarter final an lut a, Gunea an hmachhawn zui leh ang.
Pathianni zana inkhel dangah Equatorial Guinea leh Guinea te chu Stade Olympique Alassane Ouattara-ah an inhmachhawn ve thung. Anni pahnih hi an inhnehtawk viau a, goal pawh an lut har hle. Minute 55-naah Equatorial Guinea player Federico Bikoro hnawhchhuah a ni. Tlem zawk ni chungin an tang rei thei viau. Hun rei tak goal lut a awm theih loh hnuin hun pek belh tawp dawn minute 90+8-ah Guinea tan Mohamed Bayo chuan goal pawimawh zet mai a thun a, Equatorial Guinea lakah si khat faia hnehna changin, quarter-final an lut zui ta a ni.
Champion ngun ber Egypt an tla
