Champion thar Strickland
Pathianni zing khan Sydney, Australia-ah UFC 293 neih a ni a, middleweight huanga kawnghren inchuhnaah Sean Strickland chuan champion lai Israel Adesanya a hneh a, phu takin a champion.
American fighter Sean Strickland hi Israel Adesanya kawnghren chuhpui tura ruat lawk a ni lova, kawnghren chuh tura ruat pangngai Dricus du Plessis inhliam vanga ruat chawp chuk chuk a, kawnghren chuh theihna hun remchang nei ve ta chauh a ni. World Champion nih theihna hun tha a neih chhawr tangkai ngei tumin tan a khawh a, inlehthalna lian thlentirin a champion ta hial a ni.
Round khatnaah rin kai lo zawk Strickland hian bul a tan tha a, chiang taka a khingpui hnek fuhin, Adesanya a hnek tlu nghe nghe. A khingpui a hnek tluk hnuin na taka bawhzuiin, hnek tlawm nghal tum bawk mah se a hlawhtling zo bik lo. Round khatna ang tho in round dangah pawh a khingpui a nawr char char a, champion lai Adesanya hi che hleithei lovin a siam. Mit la taka round nga a inlan hnuin endiktu pathumin chak zawkah an puang vek a, Israel Adesanya kawnghren chhuhsakin, Middleweight champion thar a ni ta a ni.
UFC 293-a fight ngaihven hlawh dang, palian fight-ah tualchhung tlangval Tai Tuivasa a chak zo lo. Tai Tuivasa hi a khingpui Alexander Volkov chuan round hnihnaah a rek tlawm.
Champion thar Strickland
