English Premier League club lian Arsenal chu season tharah champion ngei tumin nipui bazar inhawng mekah an tang hle. Gunners hian defender lar thar Riccardo Calafiori an la lut fel thawkhat tawh a. Player hming langsar lak tumin hma an la mek bawk.
Season hnih chhungin EPL a pahnihna ni zawn tawh Arsenal hian Euro 2024 ah Italy tana khel tha a, lar thar hluai Riccardo Calafiori an dawr fel tawh a, a khelh meka Bologna nen pawh inremna an nei fel vek tawh. Arsenal hian Calafiori manah £42.1m an thehchhuak ang a, Paolo Maldini nen an tehkhin hial tawh Calafiori hian Emirates Stadium-ah kum li cham turin contract a ziak ve thung ang. Arsenal leh Calafiori te hian mimal inremna an neih hnuin club pahnih ten inremna an nei zui ve leh a, kum 22 mi hian USA lamah medical test a hmachhawn ang a, USA zin mek a team tharte a zawm zui nghal ang.
Arsenal defender thar Calafiori hi AS Roma a inzirchhuak a ni a, Roma atang hian Genoa chu loan in a zawm. Loan a chhuah hnu hian 2022 khan FC Basel a zawm. FC Basel-ah a khelh that vangin Italian Serie A club Bologna in an la kir a, a manah €4m (£3.4m) an seng. Bologna tan hian a khel tha ta viau a, Serie A-ah vawi 30 a khel a, goal hnih a thun bakah assit vawi nga ngawt a nei. Bologna hian hun rei tak hnuah Champions League an khel phak ta hial nghe nghe.
Club tan a khelh that em vangin Euro 2024-ah Italy tan khel turin koh a ni a, Euro 2024-ah Italy tan vawi thum a khel a, a khel tha thei hle nghe nghe. Inelna lianah a chet that vangin a lar thar nghal hluai a, club lian zawk ten lak tumin an ngaihven nghal. Left back mamawh Arsenal in lak tumin an chuh chak viau a. Calafiori ngei pawh hian Arsenal zawm a lo chak ve em em bawk nen an indawr fel zui ta a ni.
EPL a khel tha tak Arsenal in an mamawh em em, season liam taa an panna langsar tak pakhat chu left-back ah a ni a, Oleksandr Zinchenko leh Poland defender Jakub Kiwior ten an inkhelh chhawk. An panna lai hnawhkhat turin defender tha zet mai Calafiori an la lut dawn a, Arsenal an khawng leh zual ngei dawn. Calafiori a luh dawn vang hian Zinchenko leh Kiwior te zinga pakhat zawk zawk tan hian Arsenal chhuahsan a tul hmel thung.
Arsenal in an mamawh left-back thar an neih thar rual hian player dang pawh an la melh tel bawk. Euro 2024-ah Spain tana khel tha tak Nico Williams chu Athletic Bilboa atanga lak tumin hma an la mek a, Williams an la thei a nih chuan an tlarhma a hmuhnawm leh zual hle ngei dawn bawk. Williams lak tuma an hel mek bakah hian Benfica atangin Viktor Gyokeres lak tumin an hel mek bawk. An tum anga an bazar thei a nih ngat chuan Arsenal hi season tharh an hlauhawm ngei dawn. Next season an ngahchhuah a beiseiawm.
Champion tumin Arsenal an tang
![](https://theaizawlpost.org/wp-content/uploads/Clipboard01-1961.jpg)