Champions League draw a chhuak
Nizan khan Uefa Champions League last 16, quarter-final leh semi-final thlenga intum thei tur an pawt fel a, knock out round hmasabera Real Madrid leh Manchester City bawk inhmachhawn nawn leh tur hi mi ngaihven pakhat a ni leh nghal chat a, a zawna season nga chhung knockout stage-a an insutna tur a ni tawh.
Europe heavyweight pahnih intawng thin hian chanchin ngaihnawm tak tak an hnutchhiah zel zul a; an intawn hnuhnunber nikum December thla group stage match-ah khan Bernabeu khelmualah comeback ropui lantirin English team khan 2-1-in record siama 15-times European champion ni thei Real kha an hneh a; kha kha April 2022 hnu lama team pahnih vawi kaw intumna a ni tawh.
City director of football Hugo Viana chuan tuntuma La Liga giants nena an intawng leh tur chungchang sawiin, “Team pahnih tan game lian a ni leh dawn a, final tluk thaw thang a ni leh ngei ang a, saw hmun kan pan leh tur saw kan hlim a ni.
“Tun season group stage-ah pawh kan lo intum tawh a, kan hmuhnawm dun leh ngian ngian khawp ang,” tiin Santiago Bernabeu-a an team lut leh tur chu a lawmawm lam a nih thu a sawi siah siah!
Champion lai Paris St Germain pawhin nikum Club World Cup final boruak chhe angreng taka an ngam loh tawh Premier League club Chelsea bawk an su leh dawn a; chum chungchang chu Chelsea director of football David Barnard chuan sawi chhuakin:
“PSG hi kan lo su zeuh zeuh tawh a, reigning champion an ni a, mahse, mipui hian nikum nipui thawt lai Club World Cup lai thil thleng kha an la theihnghilh a rinawm loh a; engpawhnise, inkhel hautak ni dawn a, kan tan erawh hlauh tur a awm lo.”
Arsenal an vannei a, last 16-ah heavyweight pumpelhin Bayer Leverkusen an tum dawn.
Premier League hmahruaitu team hian tun tournament kal laiah hian heavyweight an pumpelh thei hle a, perfect record neiin vawi riat an chak a, league phase standing-a sang ber ni chungin last 16 an lut.
Bundesliga club hneha quarter-final an luh chuan north London club hian club lian lo dang bawk pahnih Sporting emaw Bodo/Glimt emaw an tum leh thei dawn a; Real Madrid, Manchester City, PSG, Liverpool, Bayern Munich leh Chelsea awm lohna lamah Gunners hi an awm leh tlat a ni.
Group stage-a pahnihna ni chunga knock out round hmasaber lut Bayern Munich chuan play-off lama hun pek belh penalty hmanga German club Borussia Dortmund hnawtchhuaktu Atalanta an tum dawn a, Dortmund phuba laksak thei tak ang maw?
Newcastle United chuan group stage bultanna inkhela an ngam loh tawh Barcelona an su nawn leh dawn a; Liverpool leh Galatasaray an inhmachhawn bawk ang.
Premier League lama talbuai mek Tottenham Hotspur chuan Atletico Madrid an tum dawn a; Norwegian club hlauhawm zet rawn ni chho ta Bodo/Glimt chuan tun season kal laia City, Atletico leh Inter Milan an lo hneh tawh chhunzawmin Portugal team lian Sporting Lisbon ngam leh an tum ang.
2026 Uefa Champions League final hi May ni 30 khian Hungarian-ho khawpui Budapest-ah an khel dawn a ni.
Champions League draw a chhuak
