Nilaini zana an group match hnu-hnungberah chak zo loin Group F hmahruaitu Borussia Dortmund khelmualah 1-1 draw hlawhchhuak mah se Paris St Germain chuan an group-a pahnihna ni tura point mamawh zat an hmu a, Champions League knockout stage an chuangkai.
Germany ram inkhela hian goal awm loin chawlh an hmang a, second half-ah erawh tan atanga rei vak loah inhnaih tak takin goal hnih a lut thawt a; a hmasa zawk hi minute 51-a mualneitu lam chan niin, Karim Adeyemi chuan box pawna PSG defender-te ball chhuah la fuhin knock out round lut fel tawh Bundesliga team hmahruaina goal a tilut.
Tlang tura chak mamawh Ligue 1 giants tan minute nga liam leh rualin rawlthar Warren Zaire-Emery chuan Kylian Mbappe thawhrah chhawrin mikhual siphurh a sut a; minute 76-ah Mbappe hian PSG hmahruailetna goal tur a khung zet a, offside vanga hnawlsak a ni.
Kum 17 leh ni 280 chiaha upa a nih laia Paris St-Germain siphurh sutna goal thawhtu Zaire-Emery khan French player zinga Uefa Champions League game-a goal thun thei naupangber nihna record thar a siam nghal.
Point 11 hum chungin Dortmund chuan group hma an hruai hlen ta a; point riat neitu PSG-in dawtin, Nilaini zan Group F inkhel danga Newcastle United khelmuala 2-1 hnehna sualchhuak AC Milan chuan point nga neiin Europa League lam an hawi chhunzawm thei dawn.
Thawhtanni last 16 draw-a tel tur PSG hian hun rei tawh tak atang khan Champions League trophy hi an beisei ve ngar ngar reng a; Arab Qatari mihausa sum bawm nghen-chhan chungin Lionel Messi telin player tha tha an han lawrkhawm ngial a, kumin nen chhiar telin knockout stage chin chu a zawnin tum 12 an lut mai a, mahse, champion tih ni an la nei thei tlat lo a, khawvela forward hlauhawmber pawl rawn ni chho ta Mbappe bakah Neymar leh Messi-te meuh an kawl chung pawh khan Paris khawpuiah Europe club inelna hlut ber trophy hi tun thlengin a la lut zo lo.
Kum 2020 khan an ban pha thuak a, final-ah Bayern Munich an hneh lo a, season kal laiah hian engnge an thlen leh dawn kan thlir zel ang.
Champions League last 16 lut PSG
