Champwine-in Delhi lam hawi

Champhai winery atanga siam ‘Champwine’ chuan Delhi lam a hawi a, a hralhchhuah kawnga inremna thuthlung siam tumin an inruahman mek.
The Aizawl Post thudawn danin, Delhi-a marketing company ding thar deuh, ‘R&R Sales’ tih chuan Mizoram state pawn zawnga Champwine hralhna tur hian Champhai Grape Growers Society chu inremna siampui a tum a. Tunah hian Society/ winery aiawhte chu Deklhi-ah an cham mek a, inremna thuthlung tur hi an thlir ho dawn a ni.
“An ni (R&R Sales) hian min rawn be pawp hmasa a, an representative chu Mizo a ni nghe nghe,” tiin Champhai Grape Growers Society general secretary C Zohmingliana chuan The Aizawl Post zawhna a chhang a. Inbiak zui zel hi chu an winery hotute kutah an dah tih a sawi. Thudawn danin inremna hi chu August thla lam daihah an ziak fel thei chauh a rinawm a ni.
Ruahman chhin dan chuan Mizoram pawn hrim hrima Champwine hralh chu R&R Sales kut leh thuneihnaah a awm anga, winery-in a hralh dan tur rate chu Mizorama license nei vendor-te hnena an pek zat ang tho tur a ni.
Champhai Tlangsama winery-ah hian grape tui sawr sa litre nuai 1.7 leh uma thun tawh wine case 400 an la nei a. Ningani thleng khan grape chingtute hnen atang hian a rah hi an la leisak mek zel a ni. Sawrkarin phalna a pek vendor 40 chuangte hnenah an wine siam hi an pe chhuak a ni. Chhiah chawi tur a san avangin vendor-ten an la tam thin loa, beisei ang chuan tualchhungah chuan an hralh tha lutuk lo niin winery hotute chuan an sawi.