Inrinni khan Star Cement MPL 13 round 6 khelh zawh a ni a, inkhel hmuhnawm takah Chanmari FC in vawi nga chak zawn tawh Aizawl FC chak tluang lai an titawp a, 2-2 in an inhnehtak. Inkhel dangah Dinthar FC in Ramthar Veng FC an hneh a, pathumnaah an inhlangkai.
Aizawl FC an vannei
MPL 13, round 6 a inkhel ngaihven hlawh takah Chanmari FC in table chung ber luahtu Aizawl FC an hmachhawn a, vawi nga chak zawn tawh AFC lakah an chak teuh hle a, hun pek belha goal an chhuah vangin uiawm takin an chak zo lo. Si hnih an phurh zet hnua tlawm tlawm an pumpelh hram vangin Aizawl FC hi an vannei tih loh rual a ni lo.
MPL 13-ah Saipui kala kal a, an hma a ding apiang paltlu hmiah hmiah Aizawl FC hian an elpui lian Chanmari FC lakah bul an tan chhe viau a, si hnih an phur hmasa. Table-ah palina luah mektu Chanmari FC tan hian Suanngaihmuana chuan minute 31-naah hmahruaina goal a thun. Goal thun hmasa zawk an nih vangin CFC an phur a, ngam takin an khingpuite an nawr chhunzawm.
Amuana goal thun bak hi chawlhlawk hmain goal lut awm belh thei lo mahse chawlhlawk hnu lamah Chanmari FC in goal an thun belh leh thuai. Second-hafl tan atanga minute lina lekah Aron Lalrinchhana chuan an goal hnihna thuin an hmahruaina a tizau.
Si hnih ngawta an hnufual hnuin Aizawl FC in an si phurh sut ngei tumin tan an khawh a, minute 68-naah Zomuansanga goal hmangin an si phurh an sut then. An si phurh sut then bawk mahse AFC hian goal dang an thun belh thei lo reng a, season kal meka a vawi khat nan an tlawm ve dawn te nge nge niin a lang hman. An tlawm teuh viau laiin hun pek belh minute 90+3-ah an goal khatna thuntu Zomuansanga chuan goal pawimawh tak thunin an si phurh a sut zo ta nge nge. Zomuana goal thun hnuin goal dang a luh belh thei tawh lova team lian Chanmari FC leh Aizawl FC te chu 2-2 in an inhnehtak zui ta a ni.
Chanmari FC lakah vanneithlak taka tlawm pumpelh hram Aizawl FC hian khelh ruk atanga point 16 hmuin table chung ber an luah chhunzawm a, pahnihnaa awm mek Mizoram Police FC nen point liin an inthlau mek. Aizawl FC chak tluang lai titawptu Chanmari FC hian khelh ruk atanga point 9 hmuin palina an luah ve thung.
Pathumnaah Dinthar FC
Inrinni a inkhel dangah Dinthar FC chuan vanneihthlak takin Ramthar Veng FC an hneh a, point thum hlutak an hmu. Inkhel hmuhnawm takah Dinthar FC in Ramthar Veng FC an hnehna goal hi minute 40-naah Eddie Lalhmangaihzuala own-goal a ni. Dinthar FC in vanneihthlak taka point thum hmu a, table-ah hma an sawn dawrh laiin Ramthar Veng FC in vanduaithlak takin point an hmu zo lo thung.
Ramthar Veng FC hnehtu Dinthar FC hian khelh ruk atanga point 9 hmuin pathumna an luah a. Ramthar Veng FC hian khelh ruk atanga point 6 hmuin parukna an luah ve thung.
Chanmari FC in Aizawl FC an chelh
