July ni 26, Zirtawpni khan LZ Juice MLP 11 round ngana khelh tan a ni a, hmahruaitu Chanmari FC an chetha chhunzwm a, si thum faia Sihphir Venghlun FC hnehin an hmahruaina an sawh nghet. Zirtawpnia inkhel dangah Ramhlun Athletic FC chuan season kal meka chetha tak SYS FC an hneh a, point thum hlu tak an hmu.
Chanmari FC an sang zel
MPL 11-ah champion ngei tuma inbuatsaih Chanmari FC an hmuhnawm chhunzawm a, Sihphir Venghlun FC lakah chawlhlawk hmain goal thun thei bik lo mah se chawlhlawk hnu lamah dan theih an ni lo va, goal thum ngawt an thun. CFC hi season kal mekah vawi thum chak zawn thei awmchhun an ni a, round linaah Aizawl FC nen inhnehtawk bawk mah se round nganaah si thum fai ngawtin hnehna an chang zui leh a, an hmahruaina sawh nghetin an sang deuh deuh zel.
MPL club thar Sihphir Venghlun FC hian chawlhlawk hmain team lian Chanmari FC an dang tluan thei a, goal thun hmasa zawkah an tang teuh hle nghe nghe. Free-kick an chhuih tha tak chu Chanmari si nghal T Mawia chuan tha zetin a dang a, an team a chhanhim. Mizo zinga si nghak langsar T Mawia hian pui zeta free-kick a dan bakah penalty a dang bawk a, CFC an chak theih nan a thawhhlawk hle.
Chawlhlawk hmain goal lut awm thei lo mah se chawlhlawk hnu lamah player nei tha leh squad chhah zawk Chanmari FC an khel tha lehzual a, an khingpuite tan dan rual lohin an inlan. Second half tan atanga minute lina lekah khel tha tak MS Dawngliana chuan a hlawhchhuah penalty chu harsatna tawk lovin a pet goal a, hmahruaina goal a thun. Hmahruaina goal thuntu Dawngtea hian minute 60-naah an goal hnihna a thun zui leh zat a, an hmahruaina a tizau.
Chawlhlawk hma lamah khel tha viau mah se si hnih an phurh hnuin Sihphir Venghlun FC an hnual a, thochuak tur an awm tawh lo. An khingpuite an hnual laiin Chanmari FC an phur viau thung a, hun tawp dawn hnaih lamah goal an thun belh zui leh bawk. Minute 85-naah Moses Lalrinzuala chuan Chanmari FC goal thumna thunin an chakna a nem nghet a, Sihphir Venghlun FC lakah 3-0 in an chak zui ta a ni. He inkhelah hian Chanmari FC tana goal hnih thun MS Dawngliana chu ‘Kuriz man of the Match’ ah thlan a ni.
Sihphir Venghlun FC lakah an chak leh tak vangin Chanmari FC hian khelh nga atanga point 13 hmuin hma an hruai chhunzawm zel a, season tharah tlawm an la nei lo. Chanmari FC in hma lam an pan zel lai hian Sihphir Venghlun FC hian khelh nga atangin point thum chauh an la hmu thung.
SYS an chau em ni?
LZ Juice MPL 11-a team thar, rawlthar tha tak tak nen hmuhnawm taka inlan SYS FC an chau a, an squad chhah tawk loh tuarin an khelh hnuhnung pahnihah an chak zo lo ve ve. Tlawm nei lova kaltluang mek SYS hi Ramhlun Athletic FC lakah an tlawm a, season kal mekah a vawi khat nan point an hlawhchhuak zo lo.
Ramhlun Athletic hian team hmuhnawm SYS lakah duhthusama thain bul an tan a, goal an thun hma hle. Inkhel tan atanga minute lina lekah Flavius Lalruatkima chuan hmahruaina goal thun. Hma takah goal an thun vangin inrintawkna sang zawk nen an inlan a, an khel tha zui hle nghe nghe.
Hma takah goal chhuah mah se SYS an buai mai lova, huaisen takin an khingpuite an hmachhawn. Inkhel hmuhnawm takah goal a luh belh theih loh reng hnuin SYS FC in goal an thun ta ng enge. Minute 69-naah Lalramengmawia chuan goal thunin an si phurh a sut. An si phurh an sut vangin lawm viau mah se rawlthar rual team SYS an lawm rei lo. An si phurh sutna goal lawma an au thangkhawk ri a reh fel hmain Ramhlun Athletic FC in Benjamin Lalnunpuia hmangin hma an hruai nawn lehna goal an thun a, minute 70-naah hma hruai zawkah an tang leh nghal. Benjamin Lalnunpuia goal thun hi hun tawp thlengin an venghim a, team hmuhnawm SYS lakah hneha hlu tak changin point thum hlu tak an hmu.
He inkhel hmuhnawm takah hian SYS FC an hneh theih nana thawhhlawk tak Ramhlun Atletic player pawimawh Reuben Lalhruaitluanga chu ‘Kuriz man of the match’ ah thlan a ni. SYS hian khel nga atangin point riat an hmu tawh a. Ramhlun Athletic FC hian khelh nga atang vekin point ruk an hmu tawh bawk.
Vawiin inkhel tur
MPL 11 round ngana hi vawiin ah khelh chhunzawm a ni dawn a, chawhnu dar 12:30-ah team lian pahnih; Aizawl FC leh Mizoram Police FC an inkhel ang a. Chawhnu dar 3:30-ah FC Bethlehem leh Chawnpui FC an inkhel zui ve leh ang.
Champion lai Mizoram Police FC lakah an chak a nih chuan Aizawl FC in khelh nga atanga point 11 hmuin pahnihna an luah chhunzawm ang a. An inhnehtawk a nih pawhin AFC hian point kua hmuin pahnihna an luah chhunzawm tho bawk ang. Aizawl FC lakah an chak a nih chuan MPFC in khelh nga atanga point 9 hmuin pahnihnaah an inhlangkai dawrh ang a. AFC nen an inhnehtawk a nih chuan pont 7 hmuin palinaah an awm chhunzawm thung ang. Inkhel hmuhnawm a nih ngei a rinawm.
Chanmari FC in an hmahruaina an tizau
