July ni 23, Thawhlehni khan LZ Juice MLP 11 round 4 khelh zawh a ni. Thawhlehnia inkhel hmuhnawm takah team lian Chanmari FC leh Aizawl FC te an inhnehtawk. Thawhlehnia inkhel hnuhnung zawkah Sihphir Venghlun FC in Ramhlun Athletic FC an hneh a, point thum an hmu.
Chanmari FC 0-0 Aizawl FC
MPL 11-a khel tha dun tak, tlawm nei lova kal tluang ve ve Chanmari FC leh Aizawl FC ten hmahruaitu nih an inchuh a, inkhel hmuhnawm takah chak zawk an awm thei lo. Chanmari FC hi season thara khel tha ber an ni a, vawithum chak zawnin point kua an hmu a, table chung berah an awm. An elpui lian AFC an hneh a nih chuan hma an hruai fal leh zual thei dawn. Hei vang hian chak ngei tumin tan an khawh a, AFC lakah khel chhe lo viau mah se goal an thun thei bik lo. Aizawl FC hneh zo lo mah se khel li atanga point 10 hmuin hma an hruai chhunzawm tho thung.
I League leh MPL champion hlui Aizawl FC hian an chunga awm mek CFC an hneh a nih chuan khelh li atanga point 10 hmuin hmahruaitu thar an ni thei dawn a, hmahruaitu thar nih ngei tumin tan pawh an khawh nasa hle. Goal thun tumin tan khawh viau thin mah se Chanmari FC tlarhnung khawng tak an thiat hleithei lova, hnehna an chang zo lo. Hmahruaitu Chanmari FC hneh zo lo mah se an tlawm bik loh vangin AFC tan result tha a ni tho thung a, point 8 hmuin pahnihna an luah let leh.
Chanmari FC nen an inhnehtawk tum hian Aizawl FC tana khel tha tak Lalthankhuma chu ‘Kuriz Man of the Match’ ah thlan a ni.
Sihphir Venghlun FC 3-2 Ramhlun Athletic FC
Thawhlehnia inkhel hnuhnung zawkah Point thum hmu tawh ve ve Sihphir Venghlun FC leh Ramhlun Atletic FC te an inkhel. Goal nga ngawt luhna inkhel hmuhnawm takah Sihphir Venghlun FC in hnehna pawimawh tak an chang a, point thum hlu tak an hmu.
He inkhel hmuhnawm takah hian Ramhlun Athletic FC in bul an tan tha a, goal hnih an thun hmasa. Inkhel tan atanga minute 26-naah Richard Lalramnunpuia chuan hmahruaina goal a thun. Goal thun hmasa zawkah an tan vangin an phur a, an khel tha zui viau bawk. Hmahruaina goal an thun atanga minute ruk hnu lekah Letminlun Singson chuan Ramhlun Athletic FC goal hnihna a thun zui leh a, an hmahruaina a tizau.
Si hnih ngawt an phurh hnuin Sihphir Venghlun FC an insiamtha a, minute 37-naah Lalawmpuia chuan goal thunin an si phurh a sut a, he goal hian an team chu nasa takin a fuih phur zui nghal. An si phurh an sut vanga phur thar hluai SVFC te hi tha takin an inlan zui leh a, chawlhlawk hmain an si phurh an sut zo hman. Minute 44-naah PC Lalruatsanga chuan goal thunin an si phurh a sut zo va, 2-2 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Sihphir Venghlun FC chu goal thun hmasa zawkah an tang ve ta thung. Minute 44-naah an si phurh sutna goal thuntu PC Lalruatsanga chuan minute 51-na lekah an goal thumna leh hma an hruai letna goal a thun. Ramhlun Athletic FC in an si phurh sut tumin tan khawh nasa viau mah se goal an thun thei tawh lova, chawlhlawk dawn hnaiha an inthlahdah zeuh tuarin Sihphir Venghlun FC lakah uiawm takin an tlawm zui ta a ni.
Ramhlun Athletic FC an hneh theih nana thawhhlawk tak, Sihphir Venghlun FC tana goal hnih thuntu PC Lalruatsanga chu ‘Kuriz Man of the Match’ ah thlan a ni.
Fixture siam rem
MPL 11 round 5 hi chawlhkar thar July ni 30 leh ni 31a khelh tura ruahman a ni a. July ni 31, Nilaini khian I-Day football inelna khelh a nih dawn vangin MPL fixture siam rem a ni a, tunkarah round 5 khelh zawh a ni ang.
July ni 26, Zirtawpni chawhnu dar 12:30-ah hmahruaitu Chanmari FC leh Sihphir Venghlun an inkhel ang a. Chawhnu dar
3:30-ah SYS FC leh Ramhlun Athletic FC
an inkhel ve leh ang.
July ni 27, Inrinni chawhnu dar
12:30-ahAizawl FC leh Mizoram Police FC
te an inkhel ang a. Chawhnu dar 3:30-ah FC Bethlehem leh Chawnpui FC te inkhel ve lehin, round 5 hmawr an bawk ang.
Chanmari FC leh Aizawl FC an inhnehtawk
