Chavez Jr lung inah an khung!
Mexican boxer hmingthang Julio Cesar Chavez Jr chu kumin July thlaa United States lama a inhnek zo Immigration and Customs Enforcement (ICE) officer-te’n Studio City, Los Angeles-a an ban hnu khan Mexico sawrkar dil angin an ram lamah an thawn haw a, an ram thuneitute chuan ruihhloa sumdawng pawl lian leh thiltithei Sinaloa cartel thlawptu nia puhin lung inah an khung zui ve leh nghal.
World champion hlui Chavez hian kumin June thla khan US leilungah hian influencer-turned-boxer Jake Paul a hmachhawn a, an inhnek atanga ni nga a liam rualin man zui nghal a ni a, Mexico hmar lam state Sonora an tih lamah lung ina khung beh a ni.
Kum 39 mi hian Jake Paul a hmachhawn hma chiahin ex-UFC fighter Uriah Hall a inhnekpui bawk a; hruihrual chhunga ngaihsan a hlawh viau laiin US lama ruihhlo tawlhrutu lian leh Washington pawhin foreign terrorist organisation ang hiala a ziahluh drugs hmanga sumdawng lian Sinaloa cartel thlawptua puh a nih tak avangin Mexico sawrkar ukilte chuan thubuai rit tak an siamsak a, a insawi fihlim zo lo a nih chuan khawvelin a inhnek kan hmu z en zen tawh lo mai thei!
Chavez hi tunkar Thawhlehni daih tawh khan US chuan Mexico hnenah hlanin, ramri hrul khua Nogales checkpoint-a ICE officer-te’n an va dah rualin Sonora state capital Hermosillo khuaa an lung in (federal institution) panpui nghal a nih thu hriat a ni a, Mexico president Claudia Sheinbaum pawhin nitina a tih thin news conference-ah an rama Chavez thawnluh a nih thu hi a puang zui ve bawk.
A hmain president hian dan loa silai tawlhruk leh thuneihna chan duha pawl hminga phiarrukna leh pawikhawihna (organised crime) lama inhnamhnawih thubuai siamsak a nih thu sawiin, man theihna (warrant) pawh tihchhuah a nih thu a lo sawi tawh bawk a ni.
Mexican attorney general office lam chuan Mexican boxer an man leh thubuai siamsak chungchangah thuchhuah an la siam lo.
Weight then hrang pathuma world champion ni thei Julio Cesar Chavez-a fapa Chavez Jr hian kum 2011 atanga 2012 inkar chhung khan WBC middleweight title a kawl a, hruihrual chhungah a pa hnung zui tha thawkhat mah se thubuai rit takin a boxing zinkawng a titawp dawn nite pawhin a lang!
Chavez Jr ukil-te leh a chhungte chuan drugs sumdawngte nena inzawmna nei anga an puhna chu an hnial fithla thung.
Chavez Jr lung inah an khung!
