Chaw tha leh hrisel ei inzirtir uar thla, Rastriya Poshan Maah – National Nutrition Month 2023 chu a tum 6-na atan September thla chhunga kalpui tur a ni a, Thawhtanni khan Social Welfare & Tribal Affairs minister Er. Lalrinawma’n a hawng. Kumin thupui chu ‘Suposhit Bharat, Sakshar Bharat, Sashakt Bharat – (Chaw tha leh zirna tha nena thuam chak India)’ tih a ni.
Minister chuan India ramah taksa mamawh ang chaw tha hmu lo mi engemawzat an awm a, sawrkarin hei hi ngaipawimawhin kumtin chaw tha ei kawnga inzirtirna leh hmalakna ‘Poshan Maah’ September thlaah a kalpui thin a; hei hian rah tha a chhuah ngei a beisei tih a sawi. Poshan Maah-in a tum zinga tel, ruahtui dahkhawl leh hman tangkai bakah thupui dang chu ram hmasawnna tura tul a ni tih hria a, a hlawhtlin theih nan tan lak tlan a tul tih a sawi a ni.
Poshan Maah (Nutrition Month) hi Ministry of Women & Child Development hnuaia Nutrition Mission – Poshan Abhyiaan hmalakna zing ami niin, kum 2018 atang khan kumtin India ramah September thla chhungin hman thin a ni a. Kumin bikah chuan thupui zulzui hian hmalak dan tur chi sarih – hnute tui leh chaw tha dang hmanga naute chawm len, naupang hriselna kawnga intlansiak, ei tur tha leh zirna kalkawp tir, nunphung dik leh tha hmanga hrisel, ram leh hnam hmangaihna kawnga inzirtir, ei tur tha atan tualchhung thar chhuah hman leh ei chhiat avanga thisen tlakchhamna ti reh tura hma lak a, inzirtir tum a ni.
Poshan Maah kaltlang hian Poshan Abhyiaan thiltum hrang hrang – naupang kum 6 hnuailam thanthu ven, an kum leh an rih zawng inmil lo lutuk, an san zawng leh an rih zawng inmil lo lutuk nuaibo tum, hmeichhe tleirawl leh nu ho zinga thisen tlakchhamna – anaemia awm thin tih hniam leh naupiang hlim buk zang lutuk awm thin tih hniam tuma mipuiah a zau thei ang bera zirtir leh hrilhriat a ni.
Chaw tha ei inzirtir uar thla hmang mek
