K. Hmingthankaia
Mizoram tharchhuah Zikhlum, a bik takin Cherhlun tharchhuahte kha hralhna hre tha lo an inti a. Kawngsirahte khan an dah tlar dul niin TV lamah kan lo hmu a ni. Aizawlah hian englai pawhin zikhlum leh parbawr hi a to em em reng tho si a, engtizia nge ni le? Aizawl an rawn thlen zo lo nge, phurh man a to lutuk vang zawka to reng ni ang le? Phurh man to vanga zikhlum leh parbawr leh thlai dangte hi to an nih chuan, Sawrkar, Horti. leh Agri. te khan motor lian kha in la nei nel nual a ni lawm ni? Khangte khan phurhsak mai ta ula, mipuiin kan lei tlawm thei deuh anga, a chingtu lamin an hralh tha bawk anga, Sawrkarin mipui leh ram rawng a bawlna tha tak a ni mai lo maw. Dept. motor a awm lo, a rem lo a nih pawhin, transportation lam hi Sawrkarin ngaihtuahpui hi a va tha mai awm ve.
Hman deuh khan Mizorama Tomoto ching khaw hrang hrang inhmukhawmte khan, ‘ A hmunah Rs.30. hmun dangah Rs.35.’ ni tura an sawi TV lamah kan lo hmu a nih kha. Tunlai, (Nov.2024) hian Aizawlah tomoto hi a man a tlahniam hle tawh chungin, kg-ah cheng 80 aia hniam a la awm lova, kha an rate sawi kha kharchhawngtute tan chauh emaw zawk le? Nge, thil ka lo hresual zawk aw.
Tin, Mizoram tomoto hi it-awm viauin lei duh hle mah ila, phai lam tomoto aiin a thur lutuka, kan ei tha duh mang lo tlat. To deuh phei chuan lei a chakawm loh thin. Duh zawk pawh an awm teuh tho ang. Tunhmaa tomoto kan hmanna angah khan telh a rem ta vak lo a ni. A thur lutuk tihziaawm dan hi a awm lo em ni le? Keini ang duang zawh phak ve teh lah chuan min chhang fumfe thei mang si lova. Sawrkar ang hian eng thil pawh hi an han sawi hluaia, a taka zawhchian leh belhchian dawn hian, kan thil hriat duh min hrilh thei emaw, min kawhhmuh fak thei emaw hi an awm fumfe leh tlat thin lo hi a buaithlak thin a ni.
Sangha pawh hi, Mizorama tuikhuah, dil sangha aiin phai sangha, luipui, tuipui sangha hi tui ti zawk kan tam. A tharlam dan inang rau rauah. Mahse, inhnialna a tam khawp ang. Mizorama thar a nih vanga it-awm kan tih vang leh, kan rilruin tui hmel a tih avanga tui ti zawk kan tam ang. Vairam hnaiha kan awm lai chuan dil sangha hi hralh a kal ngai lova, nilengin an zuar kual a, a uih dawnah an rep a, tute emaw bum nan, luipui sangha rep zawrhin an zuar leh thin. Mizoram hmun dangah pawh tih an ching hle.
Chuvangin, Parbawr, zikhlum, tomoto, sangha, artui leh arsate, chawhmeh leh sa lam chi engpawh phailam atanga lo kal hi, dan siamchawp hmang emaw, mobe rule-in emaw, mahni hmasial vang ringawtin i lo dang ngawt thin lo ang u. Mi zawng zawng hi mahni remhriat dan leh thiam dan ang anga, theihtawpa sum hailuhna zawng theuh kan nih hi. Hmanni lawk atanga Mizoram atanga engemaw thar chhuak tute chauh tan hian he khawvel sumdawnna ram hi hawn a ni lo tih hi i hria ang u.
Eng thilah pawh Mizoram tharchhuah a awm anga, hmun dang atanga lakluh a awm bawk anga, mitinin kan duh zawng, tha kan tih zawng leh tui kan tih zawng chu kan lei mai tur a ni. A tlangpuiin phailam atanga lo kal hi a tlawm zawk thin lehnghal.
Duhthlanna hi Pathianin zalen taka Mihringte a pek a ni.