Chawimawina dawngte MJA-in lawmpui
MJA Gen. Hqrs chuan an member pahnih, tunhnaia Emmy Awards dawngtum The Times of India correspondent HC Vanlalruata leh Akashvani (All India Radio) Aizawl copy editor Isaac Zoramsanga te hnenah Inrinni khan lawmpuina a hlan a. Thuchei (citation) leh sumfai Rs. 10000 ve ve hlan an ni.
MJA president C Lalrambuatsaiha chuan, an member HC Vanlalruata leh Isaac Zoramsanga ten khawvel huap chawimawina dawngtu zinga an tel chu MJA-in a lawmpui tih a sawi a. “Mizoten journalism lamah rahbi pawimawh tak kan kai tihna a ni a, an ni pahnih hian journalism lamah thang an chhuah a ni ber a, kan chhuangin kan lawmpui takzet a ni. India ram huap emaw khawvel huap emaw chawimawina dawng thei journalist dangte pawh nei belh zel ila duhthusam a ni a, tan la zel ang u,” a ti.
Lawmpuina hlan inkhawmah hian Emmy Awards dawngtu Pu HC Vanlalruata leh Pu Isaac Zoramsanga te pawhin thu an sawi a; MJA member engemawzatin lawmpuina leh duhsakna thu an sawi bawk.
BBC chuan documentary film ‘Myanmar’s Civil War’ tih hmangin Emmy Awards 2025 a dawng a, award dawnna hi Short Form Category-ah niin, ‘Outstanding Continuing News Coverage’ tih a ni. ‘Myanmar’ Civil War’ tih documentary-ah hian HC Vanlalruata leh Isaac Zoramsanga te hi producer niin, BBC Team nen hian Myanmar ram tualchhung buaina a hmunah luhchilhin documentary an siam a ni.
Chawimawina dawngte MJA-in lawmpui
