Tunhnai international break laia Norway tana Austria a hmachhawn tuma kheimit hliamin a tlakbuak Martin Odegaard chu a lo berah pawh chawlhkar thum tal a chawlh rih tur thu Norway team doctor Ola Sand ka atangin a richhuak.
Austria ram player Christoph Baumgartner tihnat Arsenal captain Odegaard hliam dinhmun sawifiahin Ola Sand chuan player kheimit veilamah ruhtliak an hmuh loh thu leh chawlhkar thum hnu lamah chuan a thawhchhuah leh theih tawh an beisei thu a sawi.
Nations League match-a Austria an hneh hnu khan hliam nei chungin Gunners midfielder hi London khuaah a kir a, tah chuan MRI scan hmanga lo endik nawn a ni.
Kum 25-a upa Odegaard hian Pathianni north London derby-ah pawh khan mualneitu Tottenham Hotspurs a luhkhung ve thei ta lo a, Mikel Arteta chuan midfielder dang pahnih hrem tawk Declan Rice leh kumin nipui thawt laia lei Mikel Merino a chhawr thei lo bawk.
Odegaard hi an sawilawk anga chawlhkar thum a chawl tling tak tak a nih chuan Ningani Champions League game away-a Atalanta an luhkhung tur leh September ni 22 Premier League game pawimawha Manchester City an hmachhawn tur telin Arsenal game nga a khel dawn lo tihna a ni.
Chawl rih tur Arsenal captain
