YMA Chawnpui Branch chuan Thawhtanni khan YMA Day lawm pahin Aizawl City area-a YMA Branch fai lawmman pakhatna an dawn an lawm.
Hmanpuitu UD&PA minister K Sapdanga chuan, kawngpui tha leh hmasawnna ruhrel man to pui pui eng zat pawh awm se, fai taka enkawl an nih loh chuan hmasawnna tehfung an tling lo tih a sawi a. Chawnpui Veng-in kum 2025 chhunga veng fai ber lawmman an dawng chu a lawmpui tih a sawi. Veng fai ni zel theia tan la turin a sawm a. Solid Waste Management Rules thar hman turah pawh nasa lehzuala tan la turin a ngen a ni.
Bialtu MLA, adviser to CM TBC Lalvenchhunga pawhin, Chawnpui Venga sawrkar hmalakna hrang hrangah veng mipui an lawm thiam thin a, an thil dawn an phu tih a sawi. Chu’ng hamthatna avang chuan sawrkar programme tihhlawhtlin kawngah hmahruaitu veng ni turin a ngen tih a sawi bawk.
YMA Chawnpui Branch hi kum 2025- 2026 a UD&PA leh Central YMA buatsaih Aizawl City Area Branch YMA Fai Inelnaah pakhatna an ni a. Tunhnaia UD&PA department hnuaia an vengchhunga hmasawnna hna thawh hrang hrang avanga lawmthu sawina nen he inkhawm buatsaih a ni.
Chawnpui Venga sawrkarin hma a lakna avanga lawmthu sawina atan veng fai inelnaah hian theihtawp chhuahin, local council, NGO, kohhran hrang hrang leh vengchhunga sikul aiawhte nen ‘Chawnpui Faina Beihpui Komiti’ an din a. SIPMIU-in bawlhhlawh thliarhranah ‘pilot area’ ah a lo thlan tawh an nih avangin hma lak a nawm phah tih an sawi a ni.
Chawnpui-in fai ber nih lawm
