I-Day football tournament khelh mekah inrinni khan Group B a miten a vawihnih nan inkhel an hmachhawn a, Chawnpui FC leh Chhinga Veng FC ten hnehna an chang. Vawi hnih chak Chhinga Veng FC in Group B-ah hma an hruai.
Inrinnia inkhel hmasa zawkah point la hmu lo ve ve Chawnpui FC leh Project Veng FC te an inhmachhawn a, hun tawp dawn hnaih minute 90+3-ah Peter Lalrinhlua chuan goal pawimawh tak a thun a, Chawnpui FC a chakpui. Hun tawp dawna hnehna an chan hmangin Chawnpui FC hian point thum an hmu a, semi-final luh beiseina an la nei. Projec Veng FC hi khelh hnih an tlawm zawn a, khelh hmabak la nei bawk mah se semi-final beisena a chau viau tawh thung.
Inrinnia inkhel hnuhnung zawkah Chhinga Veng FC leh Mizoram Police FC ten inkhel hmuhnawm an lantir a, goal kua zet luhna inkhelah CVFC in hnehna changin point thum hlu tak an hmu.
Point thum hmu tawh ve ve CVFC leh MPFC te inkhelah hian Chhinga Veng FC in bul an tan tha viau a, minute riat chhung lekin goal hnih an thun hman. Inkhel tan atanga minute khatna lekah Malsawmkima chuan hmahruaina goal a thun nghal a. Hma taka goal an thun hnuin an khingpuite an nawr chhunzawm a, minute 8-naah Johny Lalremruata chuan an goal hnihna a thun a, an hmahruaina a ti zua.
Minute riat chhung lekin goal hnih chhuah hman mah se MPFC an hnual mai lova huaisen takin an khingpuite an nawr let. Minute 14-naah Lalbiakhlua chuan goal thunin an si phurh a sut then a, minute 30-naah Lalfakzuala’n goal thunin an si phurh a sut zo ta nge nge. Goal hnih ve ve an thun hnuin inkhel a hmuhnawm zual sauh a, goal thun tumin an innawr tawn nasa hle. Chawlhlawk hmain CVFC bawk an che fuh nawn leh a, minute 44-naa Suanngaihmuana goal thun hmangin 3-2 a hmahruai chungin chawlhlawk an hmang.
Chawlhlawk hnu lamah pawh inkhel a hmuhnawm zui zel a, minute 52-naah MS Dawnglian-a’n an goal lina a thun a, an hmahruaina a tizau. CVFC goal lina luh atang minute thum hnu lekah Lalbiakhlua chuan MPFC goal thumna thunin an si phurh a sut then a, player tawnhriat ngah Biaktea hian minute 59-naah goal thun zui lehin hattrick a siam a. A hattrick siam hmangin an si phurh a sut zo. 4-4 in hun rei tak an inhnehtawk a, chak zawk an awm thei dawn lo emaw tih hnuah MS Dawngliana chuan minute 90+1-ah CVFC goal ngana a thun leh ta mai a. Inkhel hmuhnawm leh inhnehtawk takah 5-4 in hnehna an chang zui ta a ni.
Group B-ah Chhinga Veng FC hian khelh hnih atanga point ruk hmuin hma an hruai a, semi-final lut tluk an ni tawh. Mizotam Police FC leh Chawnpui FC ten point thum ve ve an hmu mek a, Project Veng FC in khelh hnih atangin point an la hmu ve lova, table hnuai ber an luah mek.
Chawnpui leh Chhinga Veng an chak
