England-ah kumtin Cooper’s Hill Cheese-Rolling race an nei thin a, kumina hmeichhe lama pakhat chuan nikhaw hre lo chungin a tawp a thleng a, intipalh te enkawlna tura an siam puan in kaihah a harh chhuak a, chutah chuan pakhatna a nih thu a hre ve ta chauh a ni.
He Cheese-Rolling race hi Gloucester bul lawka awm, Brockworth-ah neih thin a ni a, round hrang hrang a awm a, Cooper’s Hill, tlang pang awih zet maiah double Gloucester cheese an lum a, chu chu a rualin an um ta a, a tawp thleng hmasa berin lawmmanah cheese an dawng thin. Tlang pang hi a awih em avangin cheese umtu chu an let tawp tawp a, intipalh leh inhliam palh pawh an awm nual thin a ni.
Kumin hian Canada atangin Delaney Irving, kum 19, chu he cheese-rolling race-a tel tumin hian a thawk chhuak a, hmeichhe chauh tel theihna round-ah a tel a, cheese chu an um ta a ni. A tawp an thlen hma lawkin Irving chu a inpal sual a, a bingbilet thla ta tawp tawp mai a, chuti chung chuan a tawp a thleng hmasa ber a, mahse, a tawp a thlen chuan nikhua a hre tawh lo.
Intipalhte enkawlna tura puan in an kaihah an zawn lut a, chutah chuan a han mu ve ren rawn a, a harh chhuah leh hnuah lawmman a dawng tih an hrilh ta a ni.
He sport dangdai tak mai hi ziaka hmuh theihah chuan 1826 pawh khan an lo ching tan tawh a, mahse, a khaw mite chuan kum zabi 17-naah pawh hetiang hi an lo ti daih tawh niin an sawi ve thung.
Cheese-rolling race-ah nikhaw hre lo chungin pakhatna a ni!
