Chelsea captain Azpilicueta inpuchhuak
Kum 11 lai a vawn tawh Chelsea thlahin Cesar Azpilicueta chuan Atletico Madrid a zawm fel a, west London club-a kum khat daih contract a la neih a hmang zo dawn ta lo a ni.
Chelsea captain ni chunga Man-chester City hneha 2021 Champions League trophy chawi tawh Azpilicueta hi Blues captain ni chunga Champions League title hlawhchhuak thei pahnihna niin, a club thar Atletico hian kum khat chhung atan inremna an ziahpui.
Kum 33-a upa Spain defender hian Stamford Bridge-a a khawsak chhung khan trophy awm thei chu a hawn kim a, chu’ng zingah chuan Champions League trophy bakah Premier League title pahnih a tel.
A chhuak tur chu hrehawm a tihzia social media video hmangin a lantir a, mittui tla chungin Azpilicueta chuan a hmangaih club tana a khelh chhung khan a engkim tak meuh a hlan ve tih sawi chungin, “Porto khuaa Champions League hnehna kan chan kha ka career-a hun ropui ber niin ka hria a, captain ni chunga ka trophy hmasaber a ni bawk.
“Chelsea hi ka home a ni a, a ni reng fo bawk ang a, hna dang chelh tura ka kirleh ngei pawh ka beisei,” a ti.
Azpilicueta hian a naupan lai club Osasuna-ah bul tanin, August 2012-a pound maktaduai 6.5 leka Chelse a zawm hma khan Marseille-ah kum hnih a khel bawk.
He full-back hian Blues tana match 508 a khelhah goal 17 tilut tlingin, kum 2019 khan Gary Cahill thlakin captain hna a chelh tan.
Azpilicueta hi Premier League, FA Cup, League Cup, Champions League, Uefa Super Cup leh Fifa Club World Cup-a champion vek thei player paruk zinga pakhat niin, cup final tum 13 a khelh tawh kha club record a ni nghe nghe.
Spain tan pawha game 44 khel tling Azpilicueta hian thangkhat lian zet Stamford Bridge-a a khawsak chhungin thil tam tak a tawng a, he club thuam a inbel chhunga manager lut leh chhuak 10 a hmuh hman bakah club neitu in-thlakthleng a tawng bawk.
Azpilicueta hian kum 2015 khan Jose Mourinho hnuaiah Premier League title lain, kum 2017 khan Antonio Conte hnuaiah English top flight title a hlawhchhuak leh a ni.
Tarlan tawh angin, kum 2021-ah Thomas Tuchel-a hun lai khan Chelsea skipper zinga Champions League trophy chawi thei pahnihna ni turin final-ah English club ve bawk Manchester City an hneh a; kum 2013 leh 2019 khan Europa League-ah Stamford Bridge club a champion-pui bawk.
Spaniard hian Barcelona nena sawizawm a nih laiin August 2022 khan kum hnih atan a contract neih lai a pawtsei ta zawk a, mahse, tun nipui laia manager thar Mauricio Pochettino hnuaia senior player inpuchhuak tharlam ber a ni zui ta tho a ni.
Chelsea atanga hming hraw kalbo zingah Kai Havertz chuan Arsenal panin, Mateo Kovacic chu Manchester City-ah a kal fel tawh a, Manchester United pawhin Mason Mount an lalut fel tawh.
Goalkeeper Edouard Mendy, centre-back Kalidou Koulibaly leh French defensive midfielder N’Golo Kante pawhin Saudi Pro League khel turin west London club an chhuahsan fel tawh bawk.
Chelsea captain Azpilicueta inpuchhuak
