Chelsea chhuahsana Arsenal pan Kepa
Goalkeeper Kepa Arrizabalaga chu London club ve bawk Arsenal chuan Chelsea atangin pound maktaduai 5 lekin an leichhuak a, kum 2018-a Blues-in pound maktaduai 71-a an sengluhna man kha goalkeeper fee sang ber la ni reng mah se Stamford Bridge club-in an hralhchhuahna man zet chu a hniam ta raih raih hle mai!
Spain international Kepa hi season liamta khan loan-in Bournemouth lamah an lo chhuahtir tawh a, tah chuan game 35 a va khelhsak a, tunah Gunners hian kum thum daih contract an ziahpui ta a ni.
Tarlan tak angin, kum 30 mi ni ve tawh Kepa hi kum 2018-te kha chuan a la hlu vet vet hle a, kha tih laia west London club-in a naupan lai atanga a club vawn tawh Athletic Bilbao atanga an leichhuahna man kha tun thlengin khawvela goalkeeper mana sum phawrh hnem ber a la ni ta reng a; a kumte a lo tam ve tak avangin tunah chuan to taka hralh ngaihna a awm ta bik lo a, north London lama a la insawn thei hrim hrim pawh hi a tan pawh lawmna tham tlingin a lang a, a hlim em em thu a sawi chul pawh hi a mawh lo e!
Emirates Stadium-ah hian a chipui David Raya nen hmun an inchuh dawn a; 2024-25 campaign-ah khan Cherries atanga loan-a an hawh Neto awm bawk mah se Arsenal hian an Brazilian keeper chhawr kha contract nghet an ziahpui duh ta lo a, a aiah veteran kai chho tawh Kepa lam an hawi ta zawk a ni.
Spaniard Kepa hian Chelsea tan tan match 163 khel tlingin, Blues tana Champions League, Europa League leh Club World Cup trophy hawntu squad zingah a tel.
London atangin Real Madrid lamah loan-in a chhuak tawh bawk a, khatih chhung khan 2023-24 season-ah Spanish giants chu La Liga leh Champions League title a lakpui leh hman hram bawk a, Gunners lamin an la hmu putar lutuk lo pawh hi a mak hran lo mai thei!
Kum 2018-a Blues atanga Thibaut Courtois a chhuah hnu leh Alisson-a’n Chelsea hnawla Liverpool zawm a thlan tak hnu khan Kepa hian London club-a insawhnghehna hun tha zet a hmu a, mahse, a Chelsea career kha rei pawh a la kalpui hmain chawlhkar khata £190,000 zet hlawh emaw world record siama goalkeeper man to ber nih kha a phu lo tih a goal ven danin a nemnghet chho ta tlat a ni.
Top professional a nihna zawnah te, squad member tha pangngai a nihna leh nungchang duhawm lo a lantir ngai lem lohna zawnah ngaihsan hlawh pangngai ni mah se kum 2019 Carabao Cup final-a thlak an tumna a hnial avang khan a nungchang chungchangah mite en dan a sirhe deuh phah lo thei lo bawk!
Kepa hi player tha pangngai chu a ni ngei mai a, mahse, sawi leh sawi hnu, goalkeeper zinga world record transfer fee thlentu han nih em hi chu a phu lem lo nia ngaitu hi a tam zawk an ni ngeiin a rinawm!
Chelsea chhuahsana Arsenal pan Kepa
