January 4, Pathianni zan khan English Permier League 2025-26 khelh chhunzawm a ni a, hmahruaitu Arsenal tan result duhthusam thlengin, team lian pali; Manchester City, Liverpool, Chelsea leh Manchester United ten hnehna an chang zo lo vek. Arsenal hnaih leh zual tura chak mamawh Manchester City chu Chelsea in an chelh a, 1-1 in an inhnehtawk.
Chelsea chhantu Enzo Fernandez
Pathianni zana inkhel ngaihven hlawh berah Manchester City chuan Etihad Stadium-ah team lian Chelsea an mikhual. City leh Chelsea te inkhel hi a hmuhnawm viau a, inkhel en manhla tak a ni. Mualneitu City in hnehna an chang teuh viau a, hun pek belha Enzo Fernandez goal hmangin Chelsea an him hram a, point khat hlu tak an hmu.
Arsenal nen an inkar tizim leh zual tura chak mamawh City hian Chelsea lakah bul an tan tha a, goal an thun teuh thei hle. An goal thun khawl Erling Haaland a hlauhawm thei viau am goal thun ngei tura ngaih a nih tawh laiin goal post a pet per hlauh thung. Chelsea him hram thin mah se an him rei lo. City in mawi takin Chelsea tlarhnung an thiat a, Tijjani Reijnders chuan minute 42-naah chiang zeta pet goal in hmahruaina goal a thun. Reijnders goal thun hnu hian 1-0 a hmahruai chungin City in hma an hruai.
Chawlhlawk hnu lamah inkhel a hmuhnawm chhunzawm a, goal thun tumin an innawr twn nasa hle. Hun pangngai tawp thlengin goal a luh belh thei lo. City lakah an tlawm ngei tura ngaih a nih hnuin Chelsea in hun tha an nei a, fuh zetin an khingpuite an nawr let. Chesea tan hian Enzo Fernandez chuan minute 90+4-ah goal pawimawh zet mai a thun a, an si phurh a sut Fernandez goal thun hnu hian goal dang luh belh lovin inkhel a tawp a, City leh Chelsea te chu 1-1 in an inhnehtawk.
An mualah an chak zawh loh vangin City leh Arsenal te inkar a zauh phah leh zual a, point 6 in an inthlau der tawh. Chelsea nen an inhnehtawk vangin City hian pahnihna luah let bawk mah se champion turin kawng harsa leh hautak zawk an zawh a ngaih phah dawn thung. Table-ah hmasawn rih lo mah se Chelsea tan City inhnehtawkpui hi result tha a ni thung.
Liverpool 2-2 Fulham
Pathianni zana inkhel dangah champion lai Liverpool chu Fulham hmachhawn turin Craven Cottage -ah an lenglut. Mikhual an nihna hmunah goal chhuah hmasa mah se an chak teuh viau thung a. Last minute-a Harrison Reed goal thung hmangin Fulham in tlawm an pumpelh hlauh a, point khat hlu tak an hmu.
Fulham hian Liverpool lakah bul an tan tha a, inkhel tan atanga minute 17-na lekah Harry Wilson chuan hmahruaina goal a thun. He goal hmang hian hun rei tak hma an hruai nghe nghe.
Chawlhlawk hmain goal thun thei lo mah se chawlhlawk hnu lamah Liverpool an che fuh a, goal an thun thuai. Manto taka an lak luh, beisei anga goal a thun mai loh vanga sawisel hlawh hman tak Florian Wirtz chuan minute 57-naah goal thunin an si phurh a sut. Wirtz hian an game hnuhnung pahnihah goal a thun zawn a, inrintawkna sang zawk nei thar lehin, EPL-ah a theihna tak tak a lantir tak tak ta nia ngaih a ni.
1-1 a an inhnehtawk reng hnuin Gody Gakpo chuan hun pek belh minute 90+4-ah Liverpool hmahruai letna goal a thun. Hun tawp dawna an goal thun hi an chakpui ngei a rinawm hman viau a, Reds tantute pawh an phurin, an sapatal nasa hman viau tawh. Dinhmun chhe takah ding bawk mah se mualneitu Fulham in Ar bawm an tah mai mai bik lova, an mualah tlawm mai an tum bik hauh lo. Hun pek belh tawp dawn hnaih minute 90+7-ah Harrison Reed chuan goal pawimawh tak thunin an si phurh a sut ta mai a. He goal hian Liverpool a barakhaih chiang hle. Reed goal thun hnu hian hun a tawp chawpchilh zui nghal a, Liverpool chuan Fulham lakah hnehna an chang zo ta lo a ni.
United 1-1 Leeds United
City leh Liverpool te an thoin Manchester United pawhin hnehna an chang zo bik lova, Leeds United nen 1-1 in an inhnehtawk.
United hian Leeds lakah si an phur hmasa nghe nghe a. Goal an chhuah hnu lawka Cunha goal thun hmangin tlawm an pumpelh hram.
Chelsea in Man. City an chelh
