March 7, Thawhleh zan khan UEFA Champions League (UCL) last 16, second leg khelh tan a ni a. Chelsea chuan Mimuala an hneh loh Borussia Dorrtmund chu si hnih faiin an lo hneh a, quarter-final an lut. Inkhel dangah Benfica chuan an mikhual Benfica chu 5-1 ngawtin an lo sawp a, awlsam takin quarter-final an lut ve bawk.
Chelsea in hma an sawn
Thlasik bazarah player lei nana sum seng hnem filawr Chelsea hian an beisei angin result tha an nei hleithei lova, sawisel an hlawh hman hle. An player tharte an la inhriatchian tawk loh vanga chak harsat Chelsea hian hma an sawn hret hret a, an khelh hnuhnung pahnihah an chak zawn ta hial. EPL-ah Leeds United an hneh hnu lawkah Borussia Dortmund hneha Champions League quarter-final an lut hi an tan a lawmawm lehzual hle ngei ang.
London club lian Chelsea hi Signal Iduna Park-ah Borussia Dortmund hneh lovin an lo tlawm tawh a, si khat phur chungin Germany an chhuahsan. Stamford Bridge-a inhmachhawn leh tur ni bawk mah se an khelh that loh lai a nih vangin quarter-final lut zo lova an tluk mai a hlauhawm hman viau. An tualzawl ah ngei fiahna hautak paltlangin, trophy lian an beisei zui theih phah.
Chelsea hian an mikhual Dortmund lakah an khel tha viau a, chak phu zawk an ni chiang hle. Inkhel tan phat atangin an mikhualte an nawr nghal chat a, goal thun theihna hun tha nei deuh malh malh mah se goal an thun thei lawk lo thun. Goal hmaah an hriam tawk loh vanga an hun tha an hloh fo hnuin chawlh-lawk dawn hnaihah goal an thun ta nge nge. Raheem Sterling chuan vei lam sir atanga ball a hmuh chu a pet thelh phawt a. Vanneihthlak taka ball chang zui lehin a khalh hnai te te a, minute 43-naah chiang zetin a pet goal ta nge nge a, hmahruaina goal a thun. Sterling goal thun hmang hian si khat faia hmahruai chungin chawlhlawk an hmang.
Chawlhlawk hnu lamah Chelsea an khel tha chhunzawm a, goal an thun leh thuai. Minute 53-naah Ben Chilwell cross chuan Dortmund defender Marius Wolf kut a fuh a, VAR rawn a nih hnuin Chelsea in penalty an hmu. Penalty-ah pawh Blues hi an vannei chhunzawm zel. Penalty hi Germany midfielder Kai Havertz chuan a pet a, a thelh hmasa zet. Havertz hian si ban pet per bawk mah se a pet hmain box chhunga lut hman an lo awm a, dan an bawhchhiat vangin Havertz hian a pet nawn leh a, a pet goal ta nge nge a, Chelsea chuan si hnih faiin hma an hruai zui ta a ni.
An mualah si hnih faia hma an hruai vangin Chelsea hian si belhkhawmah 2-1 in hma an hruai a, Dortmund an lehthal ta chiah. German club lian Dortmund hian an si phurh sut ngei tumin tan an khawh zui chiam a. Si phurh belh huamin inlan bawk mah se goal thun tur khawpin Chelsea an nawr tlang hleithei lova, goal chhua belh hlauhawm zawkah an tang reng. Hun tawp thlengin goal dang a luh belh thei lova, Chelsea chuan Borussia Dortmund hnawtchhuakin Champions League quarter-final an lut zui ta a ni.
Benfica an chak nuamsa
Champions League last 16 thawhkatnaah Mimuala inlan chunga si hnih faia chak tawh Benfiaca chuan thawhlehni zan khan Estádio da Luz-ah Club Bruges an mikhual a. Anmualah 5-1 ngawta hnehna changin, nuamsa takin quarter-final an lut.
Mimualah si hnih faia chak tawh an nih vangin Portugal club lian Benfica hian quarter-final lut tura ngaih an ni a, an mualah inlan leh tur an nih vangin rin an kai leh zual. Rin lawk ang ngeiin an mikhual lakah an khel tha viau a, goal nga ngawt an thun zui ta hial a ni.
Estádio da Luz-a an mikhual Club Bruges lakah hian minute 38-naah Rafa-an hmahruaina goal a thun a. Chawlhlawk dawn hnaih minute 45+2-ah Goncalo Ramos chuan an goal hnihna a thun zui leh a. Si hnih faia hmahruai chungin chawlhlawk an hmang.
Si belhkhawmah 4-0 ngawta hmahruai tawh Benfica hi chawlhlawk hnu lamah an khel tha chhunzawm zel. Minute 57-naah Goncalo Ramos chuan an goal thumna a thun a. Minute 71-naah João Mário chuan penalty atangin an goal lina a thun zui leh bakah David Neres chuan minute 77-naah an goal ngana a thun belh leh ta cheu a. An mikhual lakah a khat mawi tawkin goal an thun a ni ta ber mai.
Si belhkhawmah 7-0 ngawta hnufual zawk ni mahse Club Bruges hian goal khat tal thun tumin tan an khawh a. Hun tawp dawn hnaih minute 87-naah Bjorn Meijer chuan zangna dawmna goal a thun ta nge nge. Bjorn Meijer goal thun hnu hian hun tawp thlengin goal dang a luh belh thei tawh lo a. Benfica chuan si belhkhawmah 7-1 ngawta Club Bruges an hneh a, awlsam taka last 16 paltlangin, quarter-final an lut zui ta a ni.
Chelsea in quarter-final an lut
![](https://theaizawlpost.org/wp-content/uploads/2023/03/ch.jpg)