Chennai-a Kalaignar multi-speciality hospital-a doctor pakhat chuan chemte hmanga beih tawkin, hliam na tak a tuar.
A beitu hi kum 26 mi nia sawi a ni a, damdawi inah hian damlo anga inlanin oncologist Dr. Balaji Jaganathan hmu turin a lut a, a luh rual hian doctor chu chemte hmangin a bei zui ta mai nia sawi a ni.
Damdawi in thuchhuahin a tarlan danin, doctor hian a nghawng, lu leh a awm chunglamah hliam a tuar a, a invenna lamah a bengah hliam a tuar bawk a ni.
Hospital staff te chuan pawikhawihtu hi tlanchhiat a tum laiin an man thu leh, Guindy police station-ah an dah thu an sawi.
An sawi dan chuan doctor beitupa nu hi kumin May leh November inkar khan he damdawi inah hian cancer vanga enkawlin a awm a, doctor ten a nu an enkawl danah lungawi lovin he thil hi a tita nia sawi a ni.
Service and PG Doctors Association chuan pawikhawihna thleng chu an dem thu sawiin, rang taka chhuichianna neih an phut tih an sawi a, hospital lam pawh hian lungawilohna lantir zui nghalin, emergency-ah chauh an damdawi in chu an hawng rih bawk.
Tamil Nadu chief minister MK Stalin chuan thil thleng chu a dem thu sawiin, doctor hliam tuar chu enkawlna tha tak pe tura a hriattir nghal thu a sawi a, pawikhawihtu chu a phu tawk hremna pe ngei tura thuneitute a hriattir tawh thu a sawi bawk.
Chemte hmangin Chennai doctor-in beih tawk
