Nitesh Tiwari film siam, Ranbir Kapoor channa, Hindu sakhuaa thawnthu ngaihnawm leh pawimawh ‘Ramayana’ film chu vawiin, November ni 5, 2026 atang hian cinema hall-ah an chhuah tan dawn ta a, he film hi part hnih a then niin, a then hnihna hi 2028-a tlangzarh tur niin report a awm a, a film siam nan hian production budget cheng vaibelchhe 4,000 lawih a ni a, hei hian a boruak pawh a tilian hle a, a film chhuah hma a cinema hall ticket lo lei lawkna ringawt pawh cheng vaibelchhe 100 dawn a ni.
He film-ah hian Ranbir Kapoor chu Lord Rama lemah changin, Sai Pallavi chu Goddess Sita lemah cangin Yash chu Ravana lemah a chang ve thung a, India mai bakah rampawn lam thlengin a boruak a lian riau a ni.
Sacnilk chuan November ni 4 zing thlenga ‘Ramayana’ atana advance booking hi India-ah cheng vaibelchhe 96.64 niin an tarlang a, a film an tlangzarh hma hauh pawhin khawpui 898-ah show 83,000 chuang atan cinema hall ticket 25,68,000 vel an hralh hman tawh a, advance booking-ah hian Hindi version chu an hralh tam ber niin, Telegu leh Kannada version ten an dawt.
He film hian US lamah pawh boruak a nei lian riau a, paid-preview booking-ah dollar maktaduai 1.2 chuang a kai a, opening-weekend advance sale-ah dollar maktaduai 3 a kai pha bawk. US bakah UK leh Australia te chu advance sale lama a chethat lehzualna te an ni.
He film hi a pahnih a siam nan cheng vaibelchhe 4,000 (dollar maktaduai 420-500) production budget a ni a, India a film siam tawh zingah chuan a manto berte zinga mi a ni. A film thenkhatna hi a sum hrawm a na zawk a, vaibelchhe 2,000 chuang hret production budget niin an tarlang a, a film siamna ngawr ngawra an sen chu cheng vaibelchhe 1,000-1,100 vel niin, a changtupa Ranbir hian a film pahnih chan manah cheng vaibelchhe 150 a hlawh dawn niin report a awm a, Ravana lema chang Yash pawin vaibelchhe 100 a hlawh dawn a, Hanuman lema chang Sunny Deol chu vaibelchhe 40 hlawh turin report a awm a, a changtunu, Sita lema chang Sai Pallavi chuan cheng vaibelchhe 12 a hlawh dawn niin report a awm bawk.
A film music pawh pui viau tura ngaih niin, Indian music maestro AR Rahman leh Hollywood composer Hans Zimmer an thawk dun a, Bollywood star rual, Ravie Dubey, Anupam Kher, Kajal Aggarwal, Rakul Preet Singh, Vivek Oberoi, Kunal Kapoor, Arun Govil, Indira Krishnan leh Lara Dutta te pawh an inlan.
Cheng vbc 4,000 senna ‘Ramayana’ film vawiinah tlangzarh dawn
