Intihcher tum te tan kan thil ei tur in-control a pawimawh a, chutiang bawkin ei tam lam pawh in-control theih a ngai a, chutiang ti hleithei lo te tan chuan intihcher a harsa thin. Chaw eina thleng lian lutuk lo hman, chaw einaah plate rawng pawl hman tih leh chaw ei hmaa tui in te pawh hi intihcher tumte tan a hlawk viau thin a, hei bakah hian method thar a rawn awm leh ta a, i ei tam lam in-control i harsat a nih chuan i kut hman thiam loh lamin chaw i ei dawn nia.
I kut hmanthiam loh lam khan leh ziah i tum chhin tawh em? I ti hleithei lo ang. Chutiang bawkin thil ei pawh a harsa, mahse, chu tak chu a thatna a ni zawk si. Kut hmanthiam loh lama chaw kan ei chuan kan lo ei muang nge nge a, kan ei tlem phah zawk thin niin an sawi.
University of Southern California a mithiam ten zirchianna an neih atanga an hmuh danin, kut hmanthiam loh lama chaw kan ei hian thil kan ei tlem zawk zel niin an sawi a, chuvangin dinglam hmang thiam zawk i nih chuan, intih cher i tum a nih chuan i veilamin chaw ei la, chutiang bawkin veilam hmangthiam zawk tan chuan kut dinglama chaw ei tur a ni. Zirchianna neitute hian cinema hall-a cinema en thin te chu an popcorn ei tur an kut hmanthiam loh lama an ei leh hmanthiam lama an ei dan te an enchhin a, chuta an hmuh tak chu, hmanthiam loh lama popcorn ei te chuan an ei tlem zawk zel a ni.
Cher duh tan hmanthiam loh lama chaw ei
