Chetsualnaah mi pathum thi
Hmun thuma chetsualna thlengah mi pathum an thi.
February 24 zing dar 9.00 vel khan Rothuama (40), Melthum chu Hlimena mi huana a inhlawh tur chesualin a thi. Thudawn danin, Rothuama hi Thawhtanni zing khan Melthum atangin Hlimenah hna thawk turin a kal a, a thawhpui tur thleng hmasaten a thlen tak mai loh avangin an ngaihven a, a hnathawhna tur huan thlen hma deuhah a ruang hmuh a ni. Kawng atanga a thlang feet 4 vela sangah a ruang hi a lo awm a, a kalnaah chesualin a lu sawh zawngin a tla thla nia ngaih a ni. A ruang hi an khua, Saikhumphai Champhai district-ah lak a ni.
February 23 zing khan Zothanmawia (33) s/o Sanghmingthanga (L), Champhai Vengthlang chu lirtheia chesualin a thi. Thudawn danin Zothanmawia hi Champhai Tourist Lodge thlangah February 22 zan khan a thianpa nen lirtheiin an chesual a, hliam tuarin damdawi in panpui a nih hnu ah a hliam tuar loin Feburary zing dar 1.55 velah a thi. Kar kalta Inrinni khan an veng Champhai Vengthlang YMA hian thlan lai lawkin an hnatlang a, hetah hian Zothanmawia pawh hi hnatlangin ve in, ama hoa thlan an laih lawkah phum a ni.
February 23 zan dar 10.25 khan Malsawmdawngliana (32) s/o Kawlkhuma, Champhai, tuna Zuangtuia khawsa chu Thuampuia AMC building bul footpath thlangah hliam tuara hmuh a ni a, damdawi in thlenpui a nih hnu ah a thi. Thudawn danin, Malsawmdawngliana hi a chhungte Zuangtuia awm hnena cheng a ni a, Pathianni chawhma inkhawm hlan khan lengchhuakin, a haw tak mai loh avangin an ngaihven a, Thuampuia AMC office epa footpath thlangah hian hmuh niin, a chesual palh nia rin a ni. Greenwood Hospital panpui a ni a, damdawi in thlenpui hlim thleng hi chuan harh viau angin lang mah se, a lu a sawh nia a lan avangin a biak tlak meuh loa, a hnu ah a chat zui ta mai nia sawi a ni.
Chetsualnaah mi pathum thi
