Chetsualnaah pahnih thi
Tunhnaiah electric current man vang leh lirthei chil avangin mi pahnihin nunna an chan.
October 25 (Pathianni) zing dar 5.40 vel khan Chaltlang Lily Veng huamchhung Sairang Road-ah a zing insawizawi kawngsira a kal chu truck-in a chil a, ka chhawn lohin a thi. Truck khalhtu hnamdang hi police-in an la a, thubuai siamsak a ni.
Thudawn danin R Lalthakima hi UPC (NEI) North Mizoram District Chaltlang Bial Sunday School director ni lai a ni a. Mizoram State Cancer Institute Zemabawk-a thawk niin, a nupui leh a date pahnih nen Chaltlang Salem Vengah an khawsa a ni.
October 23 chawhnu dar 2.45 khan Eklavya Model Residential School (EMRS) Thenzawl-a hna thawka inhlawh Amitua Chakma (23) Jarulsury Lawngtlai district chu an hnathawhna bula electric line (33kV) leh a iron rod khawih intawk palh vangin electric current hian a man a. Thingsulthliah damdawi ina hruai nghal ni mah se, a hliam tuar loin a thi.
Thudawn danin, EMRS Tlungvel main building hi sak mek a ni a, inchung lama in sakna rod an pawt chho tur chu 33 kV line hi an han tawk fuh palh nia hriat a ni.
Kumin September 19 khan EMRS-ah vek hian Tlungvel khaw mi, hna thawka inhlawh Lalramhluna pawh 33 kV line hian a lo man tawh a, vanneihthlak takin nunna a chan lo tih thu dawn a ni.
Chetsualnaah pahnih thi
