Chhattisgarh-ah Maoist pathum that

Chhattisgarh-ah Maoist pathum that
Chhattisgarh-a Bijapur district-ah venhim hna thawktute nen an inbeihnaah Maoist pathum thah an ni tih police-in an sawi.
Indravati National Park huam chhunga ram hnuaiah venhim hna thawktu pawl hrang hrangin Maoist laka beihpui an thlaknaah Pathianni tuk khan silaia inbeihna hi a thleng tih Inspector General of Police, Bastar Range, Sundarraj P chuan a sawi.
Beihpui thlaknaah hian District Reserve Guard (DRG), Special Task Force (STF) leh District Force an tel tih a sawi bawk.
Silai puak a reh hnuah hian Maoist pathum, ‘uniform’ nena inthuam chu an ralthuamte nen hmuh zui a ni a. Automatic rifle-te pawh hmuh niin puak thei dang pawh hmuh a ni tih Sundarraj chuan a sawi.
An thiante dang zawn zui hna thawh nghal mek a ni bawk.
Tun tuma mi nen hian kuminah hian Chhattisgarh-ah hian inbeihna hrang hrangah Maoist 12 thah an ni tawh.
Narayanpur-Dantewada-Bijapur district inrina lai, Abujhmad-a ni thum chhung beihpui thlakna chu January 6 khan zawh niin hmeichhe pahnih telin Maoist panga thah an ni.
January 9 khan Sukma district-ah venhim hna thawktute nena inbeihnaah Maoist pathum thah an ni.
January 3 pawh khan Gariaband district-a Raipur division-ah venhim hna thawktuten Maoist pakhat thah a ni tawh bawk.
Nikum khan venhim hna thawktute hian Chhattisgarh-ah hian Maoist 219 thah an ni.
January 6 khan Maoist-te hian Bijapur district-ah IED hmangin venhim hna thawktute chuanna lirthei an bei a, police poriat leh civil mi a khalhtu an thi.