Chhetri season hnuhnungber tur?
Indian football team head coach Igor Stimac chuan season kal lai hi ram tana Sunil Chhetri inlan tawpna a nih ve tawh a rin thu a sawichhuak a, a star player chuan thla tlemte a la neihah hian amaha a tha ber a thehchhuah zui zel a beisei thu a tarlang tel.
India hmachhawp hraw zingah nakkum January ni 12 atanga February ni 10 chnunga khelh tur Qatar rama AFC Asian Cup telin, kum 38 mi Chhetri hian Asia khawmualpui inelna lian hi a vawithumna atan a hmachhawn ngei rin a ni a, he ramah hian nikum pawh khan qualification tournament-a India player pawimawhberte zingah a la tel.
All India Football Federation official website-ah Stimac chuan a captain hma hun tur chungchang tarchhuakin, “Tun ang kum tawhah chuan kan hma tournament lian hi football a mangthana turte pawh a nih ngei tawh hmel.
“Tim loin han sawi ila, Sunil hian a season hnuhnung ber a hmang mek niin a ngaih theih ve tawh a, Asian Cup bik phei chu a khelh tawpna tur a nih tawh hmel,” a ti.
India national team hi March ni 22 atanga thenawm Imphal khawpuia khelh tan tur Tri-Nation Football Tournament inbuatsaihna atan Qatar ramah hian five-day camp kalpuiin an thang mek a ni.
Cristiano Ronaldo (118) leh Lionel Messi (98) tih loha intenational goal khung hnem ber ni mek Chhetri hian ram tan goal 84 khawl tling tawhin, kum 2011 leh 2019 Asian Cup-ah pawh khan Indian team-ah a lo tel tawh a ni.
2023 Asian Cup nghakchhuak turin thla 10 a la awm a; world ranking-a 106-na luah mektu Blue Tigers hian Imphal khuaa ram pathum inelna international tournament-ah hian an aia ranking nei sang zawk Kyrgyz Republic (94) leh an aia hniam ve lehchhawng Myanmar (159) an tum dawn a, hei hi nikum September thla hnu lama international match an khelh leh vawikhatna tur a ni.
International match an khelh hnuhnung pahnihah khan pakhat zawkah India chuan 1-1-in Singapore an inhnehtawkpui a, Vietnam lakah sithum faiin an tlawm thung!
Tunhnaiah Chhetri thianpa Jeje Lalpekhlua chuan khup hliam damchiang thei lo avangin football khelh a chawlhsan a; India team-ah hian Chhetri bakah kum upa lam ni ve tawh central-defender Sandesh Jhingan leh goalkeeper Gurpreet Singh Sandhu-te an la awm a, kan hma hun rei vak loah Stimac hian squad a siksawi chho tura beisei a ni.
1998 World Cup bronze medallist Croatian chuan, “Player thenkhat hi chu an hun a liam hnai ve tawh tih kan pawm a ngai a, harsa hle mah se inmangtha hun a herchhuah nge nge a ngai thin.
“Chhetri bakah Sandesh (Jhingan) leh Gurpreet (Singh Sandhu)-te hi kan team chakna ngulpui an la ni mek a, chutih rualin thudik chu thup theih a ni lo a, a pehhelna zawn ka tum hek lo. Gurpreet leh Sandesh tak hi chuan kum li nga lai hun an la nei mai thei.
“Sunil Chhetri hi tun season-ah a vang ta zauh zauh a, bench lamah hmuh tur a awm fo a, a rihna paih hniam pawh a lo ngai chho ve ta fo a, a kum angah hi chuan rihna hi buaipui tham a tling chho ve tawh reng reng a,” tih sawi chungin Asian Cup an khelh turah hian quarter-final thlen an tinzawn phawt tih a tarlang tel.
Kum 2005 khan Delhi tlangval hian a international debut nghakchhuakin, tunah hian Inrinnia Indian Super League final khel tur Bengaluru FC-ah an player pawimawh a la ni mek.
Chhetri season hnuhnungber tur?
![](https://theaizawlpost.org/wp-content/uploads/2023/03/chhetri.jpg)