Mizoram Value Added Tax 2005 (Act No.1 of 2005) in thuneihna a pek angin Mizoram sawrkar chuan petrol leh diesel ah chhiah lak a tisang a, hei hian oil man a tisang. Filling station neitu lam chuan sawrkar rate tihsan thu hi an la hriatpui lo nia hriat a ni.
Mizoram sawrkar hian petrol leh diesel-a VAT a lak thin a tihsan bakah social infrastructure & services cess leh road maintenance cess a la dawn a. Taxation department-in 2024 August 30-a notification a tih chhuah ang chuan,, diesel-a chhiah (VAT) 5.23% lak thin chu 10% a tihsan a ni a, petrol-a chhiah 16.36% lak thin chu 18% a tihsan a ni.
Petrol leh diesel-ah hian litre khat zelah social infrastructure & services cess Rs.2 leh road maintenance cess Rs.2 lak a ni dawn a. 2024 September 1 atanga hman tan tur a ni.
Oil-a chhiah lak leh rate lak belh hi filling station neitu lam chuan an la hre lo nia thu dawn a ni a. All Mizoram Petroleum Dealers Association president K Lalnghakliana chuan rate thar an la hmu loa, September 2 thleng kha chuan rate awmsa angin oil an la hrilh tih a sawi. Sawrkarin oil man a tih chet hian company lamin an hriatpui loh avangin dealer-ten an chawi belh thei zawk tih sawiin, rate san leh hniam chu company thuneihna niin, tunlaiah khawl hmanga thlunzawm vek an nih tawh avangin company lam thu an ngaichang lo thei lo tih a sawi a ni.
Chhiah lak belhin oil man tisang Pump neituten la hriatpui rih lo
