Chhiarpui atan larsap inziaklut
Chhiarpui 2027 thawhkhatna neih mek – houselisting leh housing census-ah larsap Gen. Vijay Kumar Singh (Retd) chu Thawhlehni khan amahin a inziaklut a. Aizawla Census Operations hotuten an buaipui sak.
Larsap chuan India rama digital census hmasa ber kalpui mek a ni chu lawmawm a tih thu a sawi a. Mizoramah pawh hlawhtling taka kalpui a nih theihnana theihtawp chhuah turin thawktute a chah. Mipui pawh he hmalakna lian tak hi ngaipawimawha, chhiarpuia inziaklut theuh tur leh official-te tha taka tawiawm turin a sawm a. Thingtlang kilkhawr bera chengte thlenga hmaih awm lo tura fimkhur tur leh, mipuiin harsatna an tawh lohnan awlsam thei ang bera chhiarpui kalpui a, hriatthiam loh a awm lohna tan la turin a fuih bawk.
Directorate of Census Operations hotute hian Mizorama census kalpui dan tura ruahmanna an siam, hmalak tawh dan leh hmachhawp an hrilhfiah a ni.
Census of India 2027 hi India rama digital census hmasa ber tur niin, thawh hniha kalpui tur a ni a. Thawh khatna Houselisting leh Housing Census hi kumin April 1 atang khan tan a ni a. Thawh hnihna – population enumeration hi February 2027-a neih tan tur a ni. Self enumeration hun hi April 1-15 inkar hawn a ni a, April 16 atanga May 15 thleng house listing leh housing census hi Mizoram puma kalpui a ni ang.
Chhiarpui atan larsap inziaklut
