Chhiarpui hmaa NRC tih phutnain Manipur-a nunphung tibuai

Zirlai pawlten chhiarpui neih hmaa National Register of Citizens (NRC) kalpui phuta darkar 48 chhung state puma nawrhna an huaihawt chuan Manipur-a phaizawl district pangaah nunphung a tibuai hle.
Nilaini khan a ni hnih nan district pangaah hian dawr inhawng a awm lo va, zirna in leh sumdawnna hmun zawng zawng pawh khar leh vek a ni a. Sorkar lirtheite chu khawlaiah hmuh tur an awm lo va, mi mal lirthei erawh tlem te tlan zauh zauh an awm thung.
Nawrhna kalpuiah hian Imphal East leh Imphal West district hmun thenkhatah chuan mau leh lunga dalna siamin kawngpui dan a ni a. ‘No NRC No Census’ tih inziakna poster tar hmuh tur a awm bawk.
Phaizawl district dang pathum – Thoubal, Kakching leh Bishnupur-ah chuan sorkar pisaa thlawktu tlem an kai a, zirna in erawh khar vek a ni thung.
Campaign for Just & Free Delimitation-in state puma nawrh huaihawt ni mah se Churachandpur telin tlangram district-ah erawh nghawng a nei lo.
Thawhlehni khan state sorkar thupuangtu, MLA Sapam Ranjan Singh-a chuan MLA aiawhte New Delhi-ah kalin sorkar laipui hotute an hmu dawn a, mipuiten an duh anga chhiarpui neih hmaa NRC kalpui dan tur an thlen dawn tih a sawi.
Manipur-ah hian Census 2027 kalpui mekah mahnia inziah luh theihna hun chu Thawhtanni atang khan hawn a ni tawh a. Ina kala in leh a chengte chhiar chu September 1 leh 30 chhunga tih tura ruahman a ni bawk.
Chhiarpui neih hmaa NRC kalpui duhtu zirlaite chuan Pathianni khan Imphal-a Directorate of Census Operations pisa tualah pungkhawmin an thil duh an lo lantir tawh a, police-ten a hnawh darh nan tear gas an lo hmang tawh nghe nghe.
Pathianni vek khan thim hlumah Imphal East leh Imphal West district-ah zirlaite hian torch rally huaihawtin NRC kalpui hmasaka an state chhunga dan lova lut leh khawsate hai chhuah hmasak phutna an lo lantir tawh bawk.
Chief Minister Y Khemchand Singh-a chuan Thawhlehni khan, “Sorkar pawhin NRC kalpui duhna hi a thlawp a. Assembly-ah pawh hei hi sawiin resolution siam a ni tawh a, sorkar laipui hnenah thlen tur a ni,” a ti.
Manipur assembly-ah hian kum 2022 daih tawh khan an state-a NRC tih tur hian thutlukna an lo siam tawh a ni.
“Bandh leh indan ang chi hian ni tina inhlawhfa leh zirlaite a nghawng thin avangin thil phut lantirna dang kalpui turin ka ngen a ni,” tiin Singh-a hian a sawi.