Chhiatrupna a thlen laia inbiakpawhna tur Public Safety and Disaster Response Communication (PSDRC) System chu nimin khan PC Vanlalruata, agriculture minister chuan RB Mc Cabe Hall, Aijal Club-ah a tlangzarh.
Minister PC Vanlalruata chuan PSDRC chu project hautak tak a nih thu sawiin, Mizoramin a tangkaipui hle dawn tih a sawi a. Chhiatrupna laka inven leh inpuahchahna (training) pawh neih thin a nih thu sawiin, hei aia ngawrh zawka neih pawimawh a tih thu a sawi bawk.
Sushil Singh, IAS, DM&R Special Secretary chuan Mizoramin hetiang khawl hi a mamawh takzet thu leh, harsatna a thlen hunah a mamawhna leh a tangkaizia kan hrechhuak dawn a ni, a ti. India rama hetiang system an neih that ber berte nena intluktlâng a nih thu sawiin, hlawhtling taka hman a nih theih nan DC te leh DM&R Department te thawhhona tha tak neih a tul thu a sawi bawk.
Aizawl DC Er. Lalhriatpuia, IAS chuan technical report a pe a. Inbiakpawhna khawl chu antenna hmang a ni a, physical wire awm lovin signal dawn nan electromagnetic wave a hmang a. Project chu eng ang pawhin tha mah se, a enkawlzui leh hman tangkai (Operation and Management) a nih loh chuan a hlawhtling dawn lo a ni, tiin a sawi.
He project khawihtu FC TecNergy company aiawh pawhin thu sawiin, anmahni chu alternate energy communication lama specialize an nih thu leh, India ram hmun hrang hranga an lo thawh tawh thin thu a sawi a. Mizoramah pawh kum tam tak an lo thawh tawh thu sawiin, tuna an khawl chuan chhiatrupna avanga current a awm loh hunah pawh darkar 100 tal chu inbiakpawhna a buai dawn loh thu a sawi a ni.
PSDRC System hi chhiatrupna thlen laia chhanhimtute (SDRF, Police, Fire Services) inbiakpawhna chatlak a thlen loh nana duan a ni. He system mechanism bulpui ber chu inbiakpawhna hmanrua tangkawp (overlapping communication) a ni a, a pui ber (primary) atan Aizawl khawpuiah DMR Tier-III Trunking network hman a ni a, Kolasib, Champhai leh Lunglei district-ah te DMR Tier-II Conventional network hman a ni thung. Hemi puitu (secondary) atan hian Mizoram pum huapa hman theih turin 4G/5G broadband kaltlangin Mission Critical Communication System (MCCS) a awm bawk.
Heng network pahnihte hi State Emergency Operation Center (SEOC), Aizawl-ah thlunzawm a ni a. Heta tang hian dispatcher-te chuan DMR leh MCCS hmangtute chu hmun khatah be pawpin thupuan (broadcast) an pe chhuak thei a ni. Call zawng zawng record thlap a nih bakah, GPS kaltlangin a hmangtute awmna hmun hriat theih a ni bawk. Harsatna thlen laia network leh hmanruate a thih mai loh nan Fuel-cell Hybrid Power leh solar hmangin darkar 100 chhung nung turin power backup dah a ni.
Chhiatna thlen huna inbiakna tur PSDRC system tlangzarh
