Tui luankawr ni na na na, bawlhhlawh paih nan kan hman hlauh thin avangin, tuihawk leh tuichhe paih ten luan ngaihna hre lovin tui luankawr ni lo zawkah, tui luankawr pawn lamah an luang hlauh a. Ruah a sur changin tuihawkin tui luankawra bawlhhlawhte a rawn khawrh chhuak a, kawngpui a hnawh bal a, a rimchhia a, a chang chuan chenna in te pawh tuihawkin a luhchhuah a, chhiatna a thlen nasa thei hle thin. Kan bawlhhlawh paihte hian tui luankawr a hnawhping lo hlauh a nih pawhin, tuihawkin bawlhhlawhte hi luiah a hnawl lut a, lui tui a tibawlhhlawh a, lui nungchaten an tawrh phah bakah, mihringin in atan kan tlan mek a nih avangin tui a tibawlhhlawh a, hriselna a khawih pawi leh tho bawk. Tui luankawr hi thatpuina tura siam a nih laiin, keini ramah chuan chhiatna thlentu atan kan chantir a ni ber.
Tun hnaiah, ‘Save the Riparian’ te chu kan tui tlan mek lui fintu tui luankawr thianfaiin an hnatlang a, tui luankawra bawlhhlawh awm dan video an tarlang a, a rapthlak hle. He pawl hian ni 20 zet bawlhhlawh thianfai hian hnatlang an nei dawn a, an thiltih a ropui takzet a, mipui pawhin thlir liam mai lova, tha thawh thei lo tan pawh kan remchan leh theihna zawnah hnatlang kan tawiawm thiam a pawimawh dawn hle; kan vai atan vek a ni si a.
Save the Riparian te hmalakna dungzui hian, Aizawl khawpui chhunga tui luankawr awmchhun ang angte hi chu, fur ruahtui a tlak hmaa a thenfai hnatlang neih hi thil tihmakmawh niin a lang. Khawpui sawrkar AMC kan nei tawh a, pawl hrang hrangte phungbawmah sawmin eng tin emaw hnatlang run pui neih dan ngaihtuah a tha hlein a rinawm. Thenfai hnuah a vengtu/viltu dahin, lawmman te pawh siam mai ni se, tui luankawr atanga bawlhhlawh luang liam thenfai lehna atana sawrkar insenso thin aiin tui luankawr vengtu lawmman atana senso hi a tlem zawk daihin a rinawm.
Khawpui ve riang ruang, tui luankawr mumal loh avanga khawpui chhung kawngpui dung zawh zawnga tuihawk a luang dul dul thin hi a zahthlak piah lamah, hei hian harsatna leh buaina a thlen nasa thin hle a. Tuiluankawr mumal loh avanga chhiatna thleng tam ta. Hei hi thuneituten an vei a ngai.
Chhiatna thlentu ‘tui luankawr’…
![](https://theaizawlpost.org/wp-content/uploads/tap_logo-min-large.jpg)