Rajya Sabha MP K Vanlalvena chuan Thingsai -Bualpui- Saisihchhuah -Pangkhua -Sangau (TBSPS) kawngpui sial mek leh Tuipui ‘D’ lei (bridge) siam thar tur chu a hmunah tunhnai khan a enfiah.
Indo-Myanmar border road siam mek Hnahthial district-a Bualpui ‘H’ leh Lawngtlai district-a Pangkhua inkar hna thawktu Border Roads Organisation-in compensation harsatna chhuanlam avanga kum 2021 atanga 2023 inkar chhung hnathawh an chawlhsan chu sawrkar laipui hotute hnenah thawk chhunzawm thuai tura a lo ngen thin tawh avanga hna chhunzawm a nih leh tak thu MP hian a sawi a. Pangkhua atanga Saisihchhuah Myanmar border road laihna atana DoNER ministry-in kum 2021-a cheng vaibelchhe 66 a lo sanction tawh, BRO-in hna an thawh loh avanga DoNER ministry-in sum sanction tawh sa a hnuhkir vek hnuah sawrkar laipuia Ministry of Defence-in Bualpui ‘H’ (Hnahthial district) lam atanga kawngpui sial hna kum 2024 tawp lam atanga an chhunzawm leh thei ta chu lawmawm a tih thu a sawi a ni.
Bualpui H atanga Tiau leh Chhimtuipui infinna bul thlenga border road laih mek hi a hmunah enin, Pangkhaw ram leh Bualpui ‘H’ ram dawh zawmtu tur Chhimtuipui lui chunga lei siam tur ban phunna lai tur BRO hotute nen an enho nghal bawk.
Hnahthial bul Darzo kai Tuipui ‘D’ a lirthei lian zawh theih tur lei siam tur ban phun tumna lai pawh hnathawktu ABCI Infrastructure hotute nen an enho a. Tuipui ‘D’ a lei siam tur hian BRO director general office Delhi-ah K Vanlalvena hian tum thum a lo lenchilh tawh a ni.
Chhimtuipui chunga lei dawh tur pahnih hi 150 metre leh 255 metre-a sei an ni a. Cheng vaibelchhe 25 leh 75 senga dawh tum a ni. September 2027 ah dawh zawh hman tum a ni tih BRO leh ABCI hotute hian Rajya Sabha MP hi an lo hrilh a ni.
BRO hotute sawi danin, Pangkhua lam atanga Saisihchhuah panna tur kawngpui sial hna hi compensation pek zawhfel hnuah tan tum a ni a; Pangkhua-a compensation pek turte chu tun atanga thla hnih chhunga pekfel vek an tum.
Thingsai leh Bualpui ‘H’ inkara blacktop loh border road km.2 a thui la awm chu a ngaimawh thu leh kumin fur ruahtui tlak hma ngeia boulder phah hman ngei a tul thu MP hian BRO hotute hnenah a thlen a. BRO hotute chuan khawtlang hruaitute nen tangrualin an tih ngei tur thu an hrilh a ni.
Chhimlam kawng siam mek MP-in enfiah
