YMA Chhinga Veng Branch chuan an kum 60 tlin, Diamond Jubilee chu Thawhtanni khan an lawm a. Aizawl East-II bialtu MLA, minister Robert Romawia Royte chuan a hmanpui.
Minister chuan YMA Chhinga Veng Branch-in kum 60 chhunga tanpui ngaite tanpuia thil tha a tih zawng zawngte chhuanawm a tih thu a sawi a. Hruaitu hmasa, sul lo sutute leh hruaitu ni mekte chu an veng tana an thawhrimna leh inpekna avangin zahna leh chawimawina a hlan tih a sawi. Aizawl East-II a kum 5 chhunga bial tana hnathawh, hna kal mek leh hmachhawp sawiin, a bial tan state budget pawnlam atangin cheng nuai 30000 chuang hu hnathawh mek, zawh tawh leh thawh tur sanction tihfel a ni tawh tih a sawi a ni.
Hmanpuitu dang, Central YMA president R Lalngheta chuan YMA-in tanpui ngaite a tanpui chhung chuan a tluk a rin loh thu a sawi a. Kohhran leh YMA chu inkawp tlat, kalhrang thei a ni lo tih a sawi. Ruihhlo bawiha tangte chhanchhuaha ruihhlo do, sex diklo taka hman dodal, fa neih tam, pian pun, hnamdang nupui pasala neih loh, kan hnampui ram danga awmte tanpuina kawngah theihtawpa tan la a, kan ram leh hnam humhalh kawngah tan la sauh sauh turin Zofate a sawm tih a sawi a ni.
YMA Chhinga Veng Branch hian an Diamond Jubilee lawmna pual hian Inter Branch YMA Basketball Tournament an buatsaih a; home pahnih – Tawngtai Bethel Camping Centre leh Operation Kingdom Ministry-ah vawk pum khat ve ve an pe. Tuitla buaipuinaa hmahruaitu leh hah zual YMA branch pathum – Sairang Branch, Sairang Dinthar Branch leh Sihhmui Branch hnenah Rs. 10000 theuh an pe a; damlo mamawhtute hman turin Civil Hospital Aizawlah thisen unit 50 an pe bawk. An branch-ah hian member mipa 1894 leh hmeichhia 981, an vaiin 2875 an awm mek.
Hruaitu hluite chawimawi an nih bakah item hrang hrang neiin, tlaiah khawtlang huapin Jubilee ruai an theh a. Zanah Jubilee kharna hman a ni.
Chhinga Veng Branch YMA-in Jubilee lawm
