Govt Chhinga Veng Middle School chuan an kum 60 tlin, Diamond Jubilee chu Thawhlehni khan an school-ah an lawm a. Aizawl East-II bialtu MLA, minister Robert Romawia Royte chuan a hmanpui.
Minister chuan kum 60 an tling ta chu a lawmpui thu a sawi a. Sawrkar school-te chu tha tawkin an rintlak hle tih lanna chu an school-in zirlai fel leh thiam tak tak an nei chu a ni, tiin, zirna chu chhungkua leh khawtlang siamthatu a ni tih a sawi. “Taimakna leh chhelna nena zir duh tak tak tan chuan retheihna in zirna a ngam lo,” a ti.
Govt. Chhinga Veng Middle School chu an kum 60 tlin lawmpuin atan Robert Romawia hian school naupangte tan school jersey leh sumfai a hlan a ni.
Govt. Chhinga Veng M/S hi 1963 January 16 a din a ni a. Kum 2001 vela SSA Mission a lo awm tak atangin school compound-ah Block Resource Centre, Training Hall, Laldenga Computer Academy-te sak a ni. A hnuah SSA Girls Hostel sak a ni leh a, school ram hawhin PHE site office pawh school ram chhungah sak a ni bawk. Kum 2023- 2024 ah zirlai 122 an awm.
Chhinga Veng M/S in Jubilee lawm
