India hmar lam chu chhum leivak chhah tak zing leh khaw vawt takin a tuam mek a, tun kar chhung hi a la tuam zui hmel bawk a. Hetih lai hian chhum zing nasa hian thlawhna vei vel pawh a tibuai bawk.
India Meteorological Department (IMD) chuan chhum leivak hi zan leh zing lamah a nasa zual dawn niin an sawi a, hmar lam bakah a thenawm hnaiha India laiah pawh ni sarih chhung a la zing thin dawn niin an sawi.
IMD hian Uttarakhand, Punjab, Haryana, Chandigarh, West Madhya Pradesh leh Bihar hmun thenkhatah Thawhtanni tuk atang khan a vawt thar hle tih sawiin Punjab, Haryana leh Chandigarh-ah a la vawt zui zel bawk tih an sawi.
Ram khawpui ber, Delhi leh NCR huam chhungah chuan IMD hian chhum lamah khua a thiang viau zel rih dawn niin an sawi lawk a, zing lamah erawh chhum a zing thin dawn niin an sawi bawk a. Delhi-ah hian khaw vawh lam hi 7 leh 19°C inkar a ni chho rih dawn tih an sawi.
Delhi thlawhna tumhmunah chuan chhum zin nasat avanga khaw hmuh theih chin a tawi em avangin thlawhna eng emaw zat zin tur thulhtir an ni a. IndiGo-in mipuite chu khaw awm dan avangin Leh-a zin fimkhur turin an chah bawk.
Mumbai-ah pawh chhum a zing nasa a, Thawhtanni tukah khan Bandra Kurla Complex leh Bandra Reclamation-a inchhawng sang chhipte chu hmuh theih mang lovin chhumin a bawh a. AQI erawh a ziaawm a, 132 niin ‘pangngai’ huangah a la awm.
India hmarchhakah Guwahati-ah pawh a vawtin chhum leivak a tam hle a. AQI chu 72 a ni a, ‘tha pangngai’ dinhmun a ni mek a. IMD chuan khaw vawh lam chu 14°C niin an sawi.
Chhum leivakin hmar lam tuam, thlawhna buai
